ქართული მხარე რუსეთის ვმო-ში გაწევრიანების წინააღმდეგია. მიუხედავად იმისა, რომ რუსეთის პრეზიდენტმა აშშ-ში ბარაკ ობამასთან შეხვედრისას განაცხადა, რომ რუსეთი წლის ბოლომდე ვმო-ს წევრი აუცილებლად გახდება, ქართული მხარე დაბეჯითებით აცხადებს, რომ რუსეთი ვმო-ს წევრი საქართველოს ნებართვის გარეშე ვერ გახდება.
როგორც სააგენტო "ჯი-ეიჩ-ენს" ეკონომიკის მინისტრის მოადგილემ ზურაბ ალავიძემ განუცხადა, საქართველოს თავის პოზიციას ინარჩუნებს და მის გადაწყვეტილებაზე აშშ-ს პრეზიდენტის განცხადებები არ იმოქმედებს.
"საქართველოს რამოდენიმე წინადადება ქონდა წამოყენებული და თუ რუსეთი მათ შეასრულებდა მაშინ ქართული მხარე რუსეთის ვმო-ში გაწევრიანებას მხარს დაუჭერდა. ქართული მხარის მოთხოვნა _ საბაჟო გამშვები პუქნტების ერთობლივი გაკონტროლება და იგივე ემბარგოს თემის ნაწილში ჩვენი მოთხოვნები უცვლელია"- განუცხადა სააგენტო "ჯი-ეიჩ-ენს" ზურაბ ალავიძემ.
შეგახსენებთ, რომ აშშ-ს პრეზიდენტმა დიმიტრი მედვედევთან შეხვედრისას განაცხადა, რომ რუსეთი ვაჭრობის მსოფლიო ორგანიზაციის წევრი უნდა გახდეს.
"რუსეთი ვაჭრობის მსოფლიო ორგანიზაციის წევრი უნდა გახდეს. ეს ხელსაყრელია რუსეთისთვის, ეს ხელსაყრელია აშშ-სთვის, ეს ხელსაყრელია ყველასთვის", - განაცხადა ბარაკ ობამამ აშშ-ს სავაჭრო პალატაში სიტყვით გამოსვლისას, რომელსაც აშშ-სა და რუსეთის საქმიანი წრეების წარმომადგენლები ესწრებოდნენ.
თავის მხრივ დიმიტრი მედვედევმა განაცხადა, რომ რუსეთი ვმო-ში გაწევრიანებას მომდინარე წლის სექტემბრის ბოლოსთვის ვარაუდობს.
ორი ქვეყნის ლიდერმა მოლაპარაკებების შედეგად რუსეთის ვმო-ში გაწევრიანებასთან დაკავშირებით ერთობლივი განცხადება გამოქვეყნეს.
შეგახსენებთ, რომ მოსკოვი ვაჭრობის მსოფლიო ორგანიზაციაში გაერთიანებას 1993 წლიდან ცდილობს. ვმო თავის რიგებში მსოფლიოს 150 სახელმწიფოს აერთიანებს.
ვმო-ს ძირითად მიზანს მსოფლიოს მასშტაბით თავისუფალი ვაჭრობის მიღწევა წარმოადგენს, ხოლო მსი ძირითი პრინციპებია: შიდა ბაზრის დასაცავად უპირატესად ტარიფული მეთოდების გამოყენება და არა რაოდენობრივი შეზღუდვებისა ან ანალოგიური მეთოდებისა; - ტარიფების დაფიქსირება გარკვეულ დონეზე, რომლის ზემოთაც ისინი აღარ გაიზრდება, ე.წ. ,,მიბმა". - ვაჭრობა დისკრიმინაციის გარეშე, რაც გულისხმობს წევრი ქვეყნების მიერ ერთმანეთისათვის ,,უპირატესი ხელშეწყობის რეჟიმის" მინიჭებას; - ეროვნული რეჟიმის დაცვას იმპორტული და ადგილობრივი საქონლისათვის თანაბარი უფლებებისა და პირობების უზრუნველყოფის საშუალებით, მასზე თანაბარი ადგილობრივი გადასახადების დაწესების დაცვით. ამდენად მცირე ეკონომიკის მქონე ქვეყნისათვის ასეთი ორგანიზაციის წევრობა საკმაოდ მომგებიანია. 1999 წლის 6 ოქტომბერს ვმო-ს გენერალურმა საბჭომ ხელი მოეწერა ვმო-ს დამფუძნებელ მარაკეშის შეთანხმებაზე საქართველოს მიერთების ოქმს.
2000 წლის 20 აპრილს საქართველოს პარლამენტმა რატიფიკაცია გაუკეთა ვმო-ში საქართველოს გაწევრიანების ოქმს და 2000 წლის 14 ივნისიდან საქართველო გახდა ვმო-ს 137-ე სრულუფლებიანი წევრი.
