დაცული ტერიტორიების სააგენტო ლაგოდეხის დაცული ტერიტორიების მართვის ეფექტიანობის, ბიომრავალფეროვნების დაცვა-მონიტორინგის, ასევე, ეკოტურისტული სერვისების გაუმჯობესების მიზნით, ახალ ინიციატივას იწყებს. ინიციატივა bp-ს ფინანსური მხარდაჭერით განხორციელდება.
დაცული ტერიტორიების სააგენტოსა და ექსპორტის განვითარების ასოციაციას (EDA) შორის ურთიერთგაგების მემორანდუმი გაფორმდა.
მემორანდუმის ფარგლებში, ლაგოდეხის დაცულ ტერიტორიებზე განახლდება ჰელიოსისტემა - დამონტაჟდება მზის პანელები, რაც უზრუნველყოფს დენის მოწოდებას ვიზიტორთა და რეინჯერთა კოტეჯებში; ასევე, ვიზიტორთა კომფორტული მოგზაურობის უზრუნველსაყოფად, საკარვე ადგილები და კოტეჯები აღიჭურვება საშხაპე სივრცეებით; მოეწყობა კლიმატური მონიტორინგის სადგური, რომელიც ოპერატიულ ინფორმაციას მიაწოდებს ადმინისტრაციას ლოკალური მეტეოროლოგიური პირობების შესახებ. აღნიშნული ინიციატივა ხელს შეუწყობს მარშრუტების ეფექტიან დაგეგმვას და ვიზიტორთა უსაფრთხოების გაზრდას.
მემორანდუმს ხელი დაცული ტერიტორიების სააგენტოს თავმჯდომარე ბესიკ კუსიდიმ და ექსპორტის განვითარების ასოციაციის (EDA) წარმომადგენელმა მაკა ჟამურაშვილმა მოაწერეს.
დაცული ტერიტორიების სააგენტოსა და bp-ს შორის წლებია მჭიდრო თანამშრომლობა ჩამოყალიბდა, რომლის ფარგლებშიც სხვადასხვა მნიშვნელოვანი გარემოსდაცვითი პროექტი ხორციელდება.
პროექტები ითვალისწინებს დაცული ტერიტორიების სისტემის მდგრადი განვითარების გაძლიერების, ბიომრავალფეროვნების დაცვის, ეკოტურიზმის პოტენციალის გაზრდის და დაცული ტერიტორიების მიმდებარედ მცხოვრები მოსახლეობის სოციალურ-ეკონომიკური პირობების გაუმჯობესების ხელშეწყობის მიმართულებებს.
