შეერთებული შტატები გააგრძელებს საგარეო დახმარებას შეერთებული შტატების საერთაშორისო განვითარების სააგენტოს (USAID) საქმიანობის შეჩერების მიუხედავად.
ამის შესახებ აშშ-ის სახელმწიფო მდივანმა მარკო რუბიომ დომინიკის რესპუბლიკის დედაქალაქ სანტო დომინგოში გამართულ პრესკონფერენციაზე განაცხადა, სადაც ის ვიზიტით იმყოფება.
"შეერთებული შტატები გაუწევს დახმარებას, მაგრამ ეს იქნება საგარეო დახმარება, რომელიც ლოგიკური იქნება და ჩვენს ეროვნულ ინტერესებს უპასუხებს", - თქვა რუბიომ.
მისივე თქმით, შტატები 30 დღის განმავლობაში დაეხმარება USAID-ისთანამშრომლებს, რომლებიც საზღვარგარეთ მუშაობენ, უკან დაბრუნებაში.
„ხალხს მიეცა 30 დღე და ჩვენ დავეხმარებით მათ სახლში დაბრუნებაში, თუ ისინი ამას მოისურვებენ ამ 30-დღიან პერიოდში. ამავდროულად, როგორც ვთქვი, თუ ვინმეს აქვს განსაკუთრებული მდგომარეობა ან რაიმე გარემოება, მზად ვართ, მოვუსმინოთ. ჩვენ არ ვცდილობთ ხალხის პირად ცხოვრებაში ჩარევას. ეს არ არის სადამსჯელო ღონისძიება. მაგრამ ეს არის ერთადერთი გზა, რითიც შევძელით USAID-თან თანამშრომლობის მიღწევა. მირჩევნია, არ გაგვეკეთებინა ეს ამ გზით“, – განაცხადა რუბიომ.
USAID-ის საქმიანობის შეჩერების შესახებ გადაწყვეტილების კომენტირებისას, რუბიომ ხაზგასმით აღნიშნა, რომ აშშ-ის პრეზიდენტის დონალდ ტრამპის ადმინისტრაცია ცდილობს "დაადგინოს პროგრამები, რომლებიც მუშაობენ და განაგრძობენ მათ განხორციელებას, ასევე გამოავლინონ პროგრამები, რომლებიც არ ემსახურება შეერთებული შტატების ეროვნულ ინტერესებს."
მან განმარტა, რომ საერთაშორისო დახმარების რამდენიმე პროგრამაზე არ გავრცელდება USAID-ის მუშაობის შეჩერების ბრძანება, მისივე თქმით, ადმინისტრაცია „მუშაობს მათ იდენტიფიცირებაზე“.
