ქართული კულტურის დღეები ესტონეთში, ტალინის რუსულ დრამატულ თეატრში, თბილისის ვასო აბაშიძის სახელობის მუსიკისა და დრამის თეატრის მსახიობებთან გამართული შეხვედრით დასრულდა.
თბილისის თეატრმა "მაკბეტი" ესტონეთის დრამატული თეატრის სცენაზე დიდი წარმატებით ითამაშა. ამ დადგმამ, რომელიც მხოლოდ 8 თვისაა, უკვე მოასწრო აღიარების მოპოვება ხორვატიაში გამართულ საერთაშორისო ფესტივალზე. სპექტაკლმა ამ კონკურზე თითქმის ყველა პრიზი დაიმსახურა.
ტალინში მყოფ ქართველ მსახიობებთან შეხვედრას ესტონეთში საქართველოს ელჩი რუსლან აბაშიძეც ესწრებოდა. მისი თქმით, ესტონეთში ქართული კულტურის დღეების ჩატარების იდეა ტალინში ორი ქვეყნის კულტურის მინისტრებს შორის გამართული შეხვედრის დროს დაიბადა.
"2011 წლისთვის, როდესაც ტალინი ევროპის კულტურულ დედაქალაქად იქცევა, უფრო დიდ პროგრამას მოვამზადებთ. პირველი შედეგით კმაყოფილნი ვართ. მიხარია, რომ ამ წამოწყებამ ასეთი კარგი შედეგები მოიტანა და ამდენი ახალი მეგობარი შევიძინეთ. ქართული თეატრი ხომ ესტონეთში 30 წლის განმავლობაში არ ჩამოსულა. ამჟამად უკვე ერთობლივ ქართულ-ესტონურ პროგრამებზედაც დავიწყებთ მუშაობას, მით უფრო, რომ ამგვარი პროექტები უკვე არსებობს", _ აცხადებს აბაშიძე.
