"ალიანსი საქართველოსთვის" ხელისუფლების მხრიდან ამომრჩეველთა და დამკვირვებელთა დაშინების ფაქტებზე საუბრობს. აღნიშნულთან დაკავშირებით მორიგი განცხადება "ალიანსის" საარჩევნო შტაბის სპიკერმა ირაკლი ჩიქოვანმა საგანგებოდ გამართულ ბრიფინგზე გააკეთა.
როგორც მან აღნიშნა, რუსეთავში ნაციონალების შტაბის უფროსი დემნა გოგოლაძე შედის ყველა უბანზე რეგისტრაციის თუ სხვა რაიმე სახის მოწმობის წარდგენის გარეშე, რაც, მისი თქმით, საარჩვენო კოდექის დარღვევაა. ამასთან, გოგოლაძე აღნიშნულ ოლქში დარეგისტრირებულია ორი პოზიციით - როგორც ნაციონალური მოძრაობის წარმომადგენელი და როგორც სპორტსმენთა კავშირის დამკვირვებელი, რაც, მისი თქმით, საარჩევნო კოდექსის დარღვევას წარმოადგენს.
ჩიქოვანის თქმით, საჩხერეში უბნებზე ღიად დგანან ნაციონალების და ქრისტიან-დემოკრატების წარმომადგენლები და აგიტაციას უწევენ მისულ ამომრჩევლებს.
"მარნეულში საარჩევნო კომისიის თავმჯდომარე ხალილოვი და კომისიის წევრი გასანოვი იმუქრებიან, თუ ბევრს იაქტიურებთ დაგიჭერთო. ახმეტაში კი პოლიციელი პაატა ნამურაძე აგიტაციას ეწევა ნაციონალური მოძრაობის სასარგებლოდ.
გორში მე-16 უბანზე რომელიც განთავსებულია სოფელ დიდ ატენში, "ალიანსის" წარმომადგენელი დააშინეს ნარკოტიკების ჩადებით და მან დატოვა უბანი", - აცხადებს ჩიქოვანი.
ჩიქოვანის თქმით, აღნიშნულთან დაკავშირებით გაკეთებულია ჩანაწერი.
"გარდა ამისა ხაშურში მე-2, მე-3 და მე-11 უბნების დამკვირვებლები სამართალდამცავებმა წუხელ დაშინეს და ისინი არ გამოცხადდნენ უბნებზე. 21-ე უბნიდან კი დამკვირვებელი მუქარით გამოაძევეს. ყველა ფაქტთან დაკავშირებით არსებობს დამადასტურებელი მასალა. შესაბამისად, დაიწერება სარჩელი და წარედგინება საარჩევნო კომისიას", _ აცხადებს ჩიქოვანი.
