მინდა გულწრფელად მოგილოცოთ 5 წლის იუბილე და წარმატებები გისურვოთ. ეს 5 წელი თქვენი სააგენტოსთვის ურთულესი იყო იმ კონტექსტში, რომ ის ძალიან რთული იყო თავად საქართველოსთვის. სააგენტო "ჯი-ეიჩ-ენი" ყოველთვის ახერხებდა ქვეყნის შიგნით და ქვეყნის გარეთ მცხოვრები მკითხველისთვის დაბალანსებული, ობიექტური ინფორმაციის მიწოდებას და რაც ყველაზე მთავარია, ოპერატიულად და სწრაფად...
ამავდროულად, პირადად ჩემთვის თქვენი სააგენტო ძალიან საინტერესოა იმ ყოველწლიური დაჯილდოების ცერემონიალითაც, რომელსაც "ოქროს პერგამენტი" ჰქვია და რომელიც ერთ-ერთი კონკრეტული პროექტისთვის წელს მეც მერგო. ეს ჯილდო ყველასთვის და მათ შორის ჩემთვისაც ძალიან დიდი პატივი და ღირსებაა და მინდა ვთქვა, რომ მას ყოველთვის ყველაზე გამორჩეულად ჩავთვლი იმ ჯილდოებს შორის, რასაც ოდესმე მივიღებ...
გარდა ამისა, უნდა ითქვას, რომ "ჯი-ეიჩ-ენმა" საერთაშორისო აღიარებაც მოიპოვა, რასაც ისიც მოწმობს, რომ წელს, თქვენი სააგენტო შავი ზღვის ქვეყნების ნაციონალური საინფორმაციო სააგენტოების ალიანსის თავმჯდომარე გახდა. ეს ძალიან მნიშვნელოვანია და ერთადერთ პრინციპულ საკითხზე მეტყველებს - "ჯი-ეიჩ-ენი" არის თავისუფალი სიტყვის, თავისუფალი ინფორმაციის გავრცელების წყარო და მისი ავტორიტეტი სწორედ თავისუფალი ჟურნალისტიკის ამ ყველაზე მნიშვნელოვან პრინციპებზეა დამყარებული.
გისურვებთ წარმატებებს და კიდევ უფრო გაძლიერებას. ამიერიდან მხოლოდ კარგი, პოზიტიური და განსაკუთრებით საქართველოს შესახებ მხოლოდ "სამშვიდობო ინფორმაციები" გეწეროთ...
ნესტან კირთაძე, პროფესორი, ლეიბორისტული პარტიის საერთაშორისო მდივანი
