ექსპორტის ხელშეწყობის მიზნით საინვესტიციო სააგენტოში ახალი სამსახურის შექმნას, კომპანია "ვი-არის" გენერალური დირექტორი შოთა ბუგეჩაშვილი დადებითად აფასებს. როგორც მან "ჯი-ეიჩ-ენს" განუცხადა, ახალი სამსახურის შექმნა კარგი გადაწყვეტილებაა, რომელიც შედეგს აუცილებლად იქონიებს.
"ეს ძალიან კარგი იდეაა, რომელსაც შესაბამისი შედეგიც მოჰყვება. მეწარმეებს დღეს ექსპორტის გაზრდისთვის, პირველ რიგში, სახელმწიფოსგან სჭირდებათ ხელშეწყობა, რათა კანონმდებლობა არსებობდეს, ისეთი, რომელიც მათ ექსპორტის ზრდაში დაეხმარება", - განაცხადა ბუგეჩაშვილმა.
მისი თქმით, სახელმწიფოს ინტერესიცაა, რაც შეიძლება მეტი პროდუქცია გაიტანონ ქართულმა კომპანიებმა საზღვარგარეთ.
ამასთან, ბუგეჩაშვილი მიიჩნევს, რომ მწარმოებლებისთვის ძალიან სასარგებლო იქნება ექსპორტის საინფორმაციო ცენტრისა და ახალი სავაჭრო ვებ-პორტალის შექმნა, რომელიც ახალი სამსახურის ერთ-ერთი ძირითადი ამოცანაა.
"სხვადასხვა ბაზრებზე არსებული ვითარების შესახებ აქამდე ინფორმაცია ჩვენთვის მხოლოდ შემოვლითი გზებით, ახლობლებისა და მეგობრების საშუალებით იყო ხელმისაწვდომი. თუ შესაბამისი ბაზა შეიქმნება, ეს კომპანიებს ძალიან დაეხმარებათ, რათა მათთვის ყველა საკითხზე შესაბამისი ინფორმაცია სწრაფად და მარტივად მიიღონ. ჩემი კომპანია ამ ეტაპზე ექსპორტზე არ მუშაობს, თუმცა, სამომავლოდ შესაძლოა სხვა ბაზრებზეც გავიდეთ და აღნიშნულ ბაზაში თავმყორილ ინფორმაციას აუცილებლად გამოვიყენებ", - განუცხადა შოთა ბუგეჩაშვილმა "ჯი-ეიჩ-ენს".
საინვესტიციო სააგენტოში ექსპორტის ხელშეწყობის სამსახური შეიქმნა, რომლის ძირითადი ფუნქცია ქართველის მწარმოებლებისა და ექსპორტიორებისთვის საინფორმაციო მხარდაჭერა, უცხოელ პარტნიორებთან კონტაქტების დამყარებაში მხარდაჭერა, ქართული პროდუქციის პოპულარიზაცია და ქართველის მეწარმეების საექსპორტო პოტენციალის ამაღლებაა. სამსახურის უახლოეს პერიოდში სავაჭრო-ვებ პორტალს აამოქმედებს და ასევე ექსპორტის საინფორმაციო ცენტრსა და ცხელ ხაზს შექმნის.
