საპარლამენტო უმრავლესობის წარმომადგენელი გოკა გაბაშვილი მიიჩნევს, რომ უცხურ პრესაში გავრცელებული ინფორმაციები აშშ-ს მიერ საქართველოს მიტოვების შესახებ სიმართლეს არ შეესაბამება და მედიის მიერ საკუთარი მოსაზრებების გავრცელებად აფასებს.
როგორც გაბაშვილმა აღნიშნა, ეს არის მხოლოდ მედიის მიერ გავრცელებული საკუთარი მოსაზრებები, რაც მისი თქმით "ყოველთვის არ შეესაბამება სიმართლეს".
"რეალურად აშშ-ის ხელისუფლების მხრიდან მუდმივად ხდება საქართველოს მხარდამჭერი განცხადებების გაკეთება და მე არ მესმის, სად ჩანს, რომ ამერიკამ საქართველო მიატოვა. იმ განცხადებებში, რაც კეთდება, თუნდაც ბოლო პერიოდში, თუ იმ ვიზიტებისას, რაც ბოლო დროს განხორციელდა", _ აცახდებს გაბაშვილი და დასძენს, რომ აშშ-ის მხრიდან ხორციელდება პოლიტიკა, რომლის თანახმადაც, უნდა გადაიტვირთოს დასავლეთის ურთიერთობები რუსეთთან და აღნიშნავს, რომ " საქართველო ამ პოლიტიკას მიესალმება, რადგან მიიჩნევს, რომ ამის პარალელურადაც შეიძლება შენარჩუნდეს სტრატეგიული ურთიერთობა საქართველოსთან".
გაბაშვილი მიიჩნევს, რომ საფრთხე მხოლოდ იმ შემთხვევაშია მოსალოდნელი, თუ რუსეთი ამ პოლიტიკას გაიგებს არასწორად და დასავლეთის სისუსტედ აღიქვამს. მისივე თქმით, საქართველოსა და ამერიკის სტრატეგიული პარტნიორობის შესუსტებაზე საუბარი არასერიოზულია".
