პროექტი „გაიცანი საქართველო“ გრძელდება. პროექტის ფარგლებში ქართველმა ჟურნალისტებმა მაჭახელას ხეობა მოინახულეს და ხეობისათვის დამახასიათებელ ტრადიციებს, სტუმარ-მასპინძლობის წესებს და ხეობაში არსებულ ტურისტულ მარშრუტრებს ადგილზე გაეცნენ.
ტურიზმის ეროვნული ადმინისტრაციის ხელმძღვანელი ამბობს, რომ პროექტის სტარტი საკმაოდ წარმატებული იყო და გიორგი ჩოგოვაძეს იმედი აქვს, რომ პროექტიდან გამომდინარე ქვეყანაში შიდა ტურიზმის სტატისტიკა გაიზრდება და საქართველოს მოქალაქეებს ქვეყნის ყველა ტურისტული ობიექტის მონახულების ინტერესი გაიზრდება.
”ტურიზმის ეროვნული ადმინისტრაცია ახორციელებს შიდა ტურიზმის სტიმულირების კამპანიას ”გაიცანი საქართველო”. პროექტის ფარგლებში იმერეთსა და სამეგრელოს შემდეგ მედიატურს ვუმასპინძლეთ აჭარაში, კერძოდ მაჭახელას ხეობაში, რომელიც გამოირჩევა იმით, რომ ეს ხეობა ძალიან უნიკალურია თავისი ბუნებით, თავისი კულინარითა და ისტორიით. მეორეს მხრივ, ის ძალიან ახლოსაა ბათუმთან. ამიტომ ჩვენი მიზანია, რომ ბევრმა იმოგზაუროს აჭარაში და მათ შორის მაჭახელას ხეობაში.
ამ პროექტის მიზანია მეტმა ჩვენმა თანამოქალაქემ დაეწყოს მოგზაურობა საქართველოში და გაცნობოს სხვადასხვა კუთხეს.
ვხედავთ, რომ ბევრს მართლაც არ აქვს ნანახი საქართველოს სხვადასხვა კუთხე და ამ კამპანიის მიზანიც გახლდა ის, რომ უფრო მეტად წაგვეხალისებინა და მეტი ინიციატივები შეგვეთავაზებინა, რათა საქართველოში დაიწყონ მოგზაურობა.
პროექტის ფარგლებში სასტუმროებთან ერთად შევადგინეთ სპეციალური პაკეტები და ჩვენს თანამოქალაქეებს გარკვეულ ფასდაკლებებსაც ვთავაზობთ. შევეცადეთ, რომ ეს არ ყოფილიყო მხოლოდ მარტო მარკეტინგული კამპანია”, აღნიშნა გიორგი ჩოგოვაძემ, რომელმაც ჟურნალისტებთან ერთად დაათვალიერა მაჭახელას ხეობა და ადგილობრივების ყოფასა, თუ პრობლემებს ადგილზე გაეცნო.
როგორც ცნობილია, პროექტი შიდა ტურიზმის განვითარების მიზნით საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის მიერ ხორციელდება.
ჟურნალისტები გაეცნენ ცნობილი "მაჭახელას თოფის" და მუჰაჯირობის ისტორიას. შემდეგ დაათვალიერეს სოფელი მირვეთი, რომელიც ხელუხლებელი ბუნებითა და ულამაზესი ჩანჩქერით რეგიონის ერთ-ერთ საუკეთესო საველოსიპედე მარშრუტსა და საპიკნიკე ადგილს წარმოადგენს. სტუმრებმა მაჭახელას ხეობის სხვა ადგილებთან ერთად ცხემლარას თაღოვანი ხიდიც მოინახულეს, რომელიც აჭარაში გავრცელებული ე.წ .თამარის თაღოვანი ხიდების საუკეთესო მაგალითია, დაათვალიერეს ასევე სოფელ ჩხუტუნეთში მდებარე ეთნოგრაფიული მუზეუმი და ამბრაზურა, რომელიც მეორე მსოფლიო ომიდან შემორჩენილი უნიკალური თავდაცვითი ნაგებობაა.
ქედის ღვინის სახლში სტუმრობისას ადგილობრივი ღვინის წარმოების ტრადიციების გაცნობასთან ერთად აჭარული სამზარეულოს ცნობილი კერძების მომზადების მასტერკლასიც შედგა.
ტურიზმის ეროვნული ადმინისტრაციის კამპანიას "გაიცანი საქართველოს" აჭარის ტურიზმისა და კურორტების დეპარტამენტმა უმასპინძლა.
