ცხინვალის მარიონეტული რეჟიმი ახალგორის რაიონში უახლოეს მომავალში ე.წ. ოსური პასპორტების გაცემას დაიწყებს. ამის შესახებ "ჯი-ეიჩ-ენს" ახალგორიდან აცნობეს.
ახალგორის ე.წ. ადმინისტრაციის წარმომადგენლები პირად საუბრებში აცხადებენ, რომ უახლოეს მომავალში ოკუპირებულ რაიონში ე.წ. ოსური პასპორტების გაცემას დაიწყებენ, რომელის აღებაც სავალდებულო იქნება ახალგორში მცხოვრებ მოსახლეობისთვის და პირველ რიგში კი იმ ადამიანებისთვის ვინც ე.წ. სახელმწიფო სამსახურებში მუშაობენ.
ამასთან, როგორც "ჯი-ეიჩ-ენს" ახალგორის გამგებელმა ავთო ყოჩიშვილმა განუცხადა, ე.წ. ოსური პასპორტების გაცემის დარიგების გეგმა დიდი ხანია არსებობს, თუმცა ამ დრომდე არ დასტურდება მათი რაინში შემოტანა.
"ახალგორის ოკუპაციის შემდეგ ოკუპანტებმა დაიწყეს საუბარი, რომ იქ დარჩენილ მოსახლეობას ე.წ. ოსურ პასპორტებს დაურიგებდნენ, თუმცა ამ დრომდე არანაირი პასპორტების დარიგება არ დაწყებულა", - აღნიშნა ყოჩიშვილმა.