აშშ-ის სამხედრო ძალების განცხადებით წყნარ ოკეანეში ნარკოტიკების გადამზიდ სამ გემზე იერიში მიიტანეს, რასაც რვა ადამიანი ემსხვერპლა.
ამის შესახებ ამერიკის სამხრეთ სარდლობა სოციალურ ქსელში წერს.
„15 დეკემბერს, პიტ ჰეგსეთის [აშშ-ის ომის დეპარტამენტის მდივანი] მითითებით, გაერთიანებულმა ოპერატიულმა ჯგუფმა „სამხრეთის შუბმა“ ლეტალური დარტყმები განახორციელა სამ გემზე, რომლებსაც ტერორისტული ორგანიზაციები საერთაშორისო წყლებში იყენებენ,“ - ნათქვამია ინფორმაციაში.
აღნიშნულია, რომ ამერიკულმა დაზვერვამ დაადასტურა, რომ გემები წყნარი ოკეანის აღმოსავლეთ ნაწილში ნარკოტიკებით ვაჭრობის ცნობილი მარშრუტებით მოძრაობდნენ და ნარკოვაჭრობას ეწეოდნენ.
დარტყმების შედეგად რვა ადამიანი დაიღუპა: სამი პირველ გემზე, ორი მეორეზე და სამი მესამეზე.
აშშ-ის სამხედროებმა დარტყმების ამსახველი 47-წამიანი ვიდეო გამოაქვეყნეს.
