"დემოკრატიული მოძრაობა - ერთიანი საქართველოს" ლიდერის ნინო ბურჯანაძის განცხადებით, საქართველოს ხელისუფლება დასავლეთის თვალში ნდობას ყოველდღიურად კარგავს.
ამის შესახებ ბურჯანაძემ ჟურნალისტებს ევროპარლამენტის კავკასიის ქვეყნებთან ურთიერთობის დელეგაციის ხელმძღვანელ მილან საბრნოშთან შეხვედრის დასრულების შემდეგ განუცხადა, რომელსაც ბურჯანაძის გარდა, არასაპარლამენტო და საპარლამენტო ოპოზიციის სხვა წარმომადგენლებიც ესწრებოდნენ.
"ჩვენს მეგობრებს, დასავლეთში უკვე ძალიან ბევრი კითხვა აქვთ. ისინი ღრმად ინტერესდებიან დეტალებით. დღეს გაცილებით ბევრ კითხვას სვამენ და ბევრად უფრო სკეპტიკურად არიან განწყობილნი, ვიდრე თუნდაც ერთი წლის წინ. ამაზე ბევრმა ფაქტორმა იმოქმედა, მათ შორის – "იმედის" ცნობილმა სიუჯეტმაც. ასეთი ნაბიჯებით ხელისუფლება დასავლეთის თანამეგობრობის თვალში ნდობას ყოველდღიურად კარგავს", - განმარტა ბურჯანაძემ.
მისივე განმარტებით, საუბარი, რასთან დაკავშირებითაც ევროპელ სტუმარს "უამრავი შეკითხვა" ჰქონდა ქვეყანაში არსებულ რეალობასა და ადგილობრივი თვითმმართველობის არჩევნებს შეეხებოდა.
მასალის გამოყენების პირობები