სკანდინავიური გარემოს საფინანსო კორპორაცია მზადაა საქართველოში საინვესტიციო პროექტების დაფინანსება დაიწყოს.
ფინანსთა სამინისტროში ხელი მოეწერა ჩარჩო შეთანხმებას საქართველოს მთავრობასა და სკანდინავიურ გარემოს საფინანსო კორპორაციას (NEFCO) შორის. ქართული მხრიდან შეთანხმებას ხელი მოაწერა ფინანსთა მინისტრმა ნოდარ ხადურმა, NEFCO-ს მხრიდან NEFCO-ს მმართველმა დირექტორმა მაგნუს რისტედტმა (Magnus Rystedt) და მთავარმა იურისტმა ტიტა ანტილამ (Tita Anttila).
NEFCO აფინანსებს პროექტებს, რომელებიც აუმჯობესებენ გარემოს დაცვას (წყალმომარაგება და საკანალიზაციო სისტემები, სუფთა ტექნოლოგიების დანერგვა, ენერგეტიკა და სხვ.) როგორც სახელმწიფო სექტორში, ასევე კერძო სექტორში. აღნიშნული საფინანსო ინსტიტუტი დაინტერესებულია დაიწყოს საინვესტიციო პროექტების დაფინანსება საქართველოში.
„ძალიან მნიშვნელოვანია ასეთი ტიპის ორგანიზაციებთან თანამშრომლობა. ეს ჩვენ გვაძლევს შესაძლებლობას, რომ შედარებით ხელმისაწვდომი რესურსები მოვიძიოთ, რომელთა მეშვეობითაც შესაძლებელი იქნება საკმაოდ სერიოზული ინვესტიციების განხორციელება, მათ შორის, ენერგოსექტორში - ენერგოეფექტურობის მიღწევის მიზნით. ვფიქრობ, რომ აღნიშნული შეთანხმება გვაძლევს კიდევ ერთ კარგ შესაძლებლობას, საქართველოს ეკონომიკა და საფინანსო ბაზარი ევროპული ბაზრის სერიოზული ნაწილი გახდეს," - განაცხადა ფინანსთა მინისტრმა ნოდარ ხადურმა.
„ჩვენთვის ძალიან მნიშვნელოვანია, რომ გვაქვს შესაძლებლობა მხარი დავუჭიროთ საქართველოს გარემოს დაცვის კუთხით, რათა ეს მიმართულება ქვეყანაში გახდეს უფრო მდგრადი და განვითარებაზე ორიენტირებული," - აღნიშნა NEFCO-ს მმართველმა დირექტორმა მაგნუს რისტედტმა.
„აღნიშნული შეთანხმების ხელმოწერა კიდევ ერთი მნიშვნელოვანი ნაბიჯია ჩვენი თანამშრომლობის განვითარების კუთხით. მინდა აღვნიშნო ის რეკორდულად სწრაფი ტემპი, რომლითაც მოლაპარაკებები წარიმართა და ხელი მოეწერა შეთანხმებას. იმედია, დოკუმენტი ხელს შეუწყობს კონკრეტული პროექტების განხორციელებას," - განაცხადა შვედეთის ელჩმა საქართველოში დიანა იანსემ.
ჩარჩო შეთანხმების გაფორმების შემდეგ NEFCO-ს დაფინანსება ხელმისაწვდომი გახდება, როგორც სახელმწიფო, ისე კერძო სექტორის ოპერაციებისთვის. შესაბამისად, ამ შეთანხმების გაფორმებით, საქართველოსთვის ხელმისაწვდომი გახდება კიდევ ერთი საფინანსო ინსტიტუტის ფინანსური რესურსი და ინსტრუმენტები.
NEFCO აფინანსებს პროექტებს ესტონეთში, ლატვიაში, ლიტვაში, რუსეთში, უკრაინაში, ბელორუსსა და მოლდოვაში.
სკანდინავიური გარემოს საფინანსო კორპორაცია (NEFCO) არის საერთაშორისო საფინანსო ინსტიტუტი, რომელიც დაარსდა 1990 წელს სკანდინავიის ხუთი ქვეყნის (დანია, ფინეთი, ისლანდია, ნორვეგია და შვედეთი) მიერ.
