დღეს, 26 თებერვალს 17:00 საათზე საქართველოს პარლამენტის ეროვნული ბიბლიოთეკის საგამოფენო დარბაზში არიელ შარონის ხსოვნისადმი მიძღვნილი (26 თებერვალი არიელ შარონის დაბადების დღეა) ქართულ-ებრაული საღამო გაიმართება. ღონისძიება ეროვნული ბიბლიოთეკის ინიციატივით ტარდება.
ეროვნული ბიბლიოთეკის საგამოფენო დარბაზში წარმოდგენილი იქნება 1999 წელს არიელ შარონის საქართველოში ვიზიტის ამსახველი ფოტოები; ეროვნული ბიბლიოთეკის ფონდებში დაცული პრესა, რომელმაც ასახა და დღემდე შემოგვინახა ისრაელის პრემიერ-მინისტრის ვიზიტის შესახებ მასალები, შეფასებები, შარონის დამოკიდებულება საქართველოს მიმართ.
ექსპოზიციაზე ასევე წარმოდგენილი იქნება ეროვნული ბიბლიოთეკის ფონდებში დაცული ქართულ-ებრაული ურთიერთობების ამსახველი ლიტერატურა, იშვიათ გამოცემათა ფონდში დაცული უნიკალური ებრაული წიგნები და ხელნაწერები.
ღონისძიების პარალელურად ეროვნული ბიბლიოთეკის კინოდარბაზში მერაბ კოკოჩაშვილის დოკუმენტურ ფილმ „დაგვიანებული კადიშის" ჩვენება გაიმართება, რომელიც არიელ შარონის საქართველოში ვიზიტსა და ქართველების ისრაელში სტუმრობას ასახავს. კინოჩვენების დასრულების შემდეგ კინორეჟისორი მერაბ კოკოჩაშვილი ფილმის შესახებ ისაუბრებს.
ღონისძიების მხარდამჭერები არიან ისრაელის საელჩო საქართველოში და "საქართველო-ისრაელის მეგობრობის საზოგადოება."
