საქართველოს მოქალაქეობის დადგენის, მოპოვების და შეწყვეტის ახალი რეგულაციები განისაზღვრება. აღნიშნული ცვლილება „საქართველოს მოქალაქეობის შესახებ" კანონში შედის. კანონპროექტი დიასპორისა და კავკასიის საკითხთა კომიტეტის წევრებს იუსტიციის მინისტრის მოადგილემ, ალექსანდრე ბარამიძემ წარუდგინა.
კანონპროექტის შესაბამისად, ბავშვი, რომლის ორივე მშობელი მისი დაბადების მომენტისთვის საქართველოს მოქალაქეა, საქართველოს მოქალაქედ ჩაითვლება დაბადების ადგილის მიუხედავად. პროექტით შემოღებულია სუროგაციის გზით საქართველოს ტერიტორიაზე დაბადებული და ასევე იმ ბავშვების მოქალაქეობის საკითხი, რომლის ერთ - ერთი მშობელი მოქალაქეობის არმქონე პირია, ხოლო მეორე განუსაზღვრელი მოქალაქეობრივი კუთვნილებისაა. კანონპროექტი ითვალისწინებს ნოვაციებს საქართველოს მოქალაქეობის მიღებასთან დაკავშირებით. მომხსენებლის განმარტებით, დიფერენცირებულია სრულწლოვანი და არასრულწლოვანი პირების საქართველოს მოქალაქედ მიღების პირობები. გათვალისწინებულია საქართველოს ტერიტორიაზე დაბადებული მოქალაქეობის არმქონე და ლტოლვილის სტატუსის მქონე არასრულწლოვნების შესაძლებლობა მიიღონ საქართველოს მოქალაქეობა. კანონპროექტი მკაფიოდ განსაზღვრავს უცხო ქვეყნის მოქალაქის საქართველოს მოქალაქედ მიღების შესაძლებლობას, ამასთანავე შემოღებულია ე.წ. პირობადებული ბრძანებულების ინსტიტუტი. გაფართოვდა დანაშაულთა ჩამონათვალი, რომელში მონაწილეობისას პირი არ იქნება მიღებული საქართველოს მოქალაქედ. ახლებური მიდგომებია შემოთავაზებული საქართველოს მოქალაქეობის აღდგენისას. კანონპროექტით საქართველოს მოქალაქეობის აღდგენით დაინტერესებული პირი თავისუფლდება საქართველოს ისტორიისა და სამართლის საფუძვლების ტესტირების გავლისგან და მოწმდება მხოლოდ ქართული ენის ცოდნის დონე. ცვლილებები შეეხო საქართველოს მოქალაქეობის დაკარგვის საფუძვლებსაც. გაუქმებულია სხვა ქვეყანაში ცხოვრების გამო (არასაპატიო მიზეზით 2 წლის განმავლობაში საკონსულო აღრიცხვის არქონა) საქართველოს მოქალაქეობის დაკარგვის შესაძლებლობა. კანონპროექტი ასევე განსაზღვრავს მოქალაქეობის არმქონეობის პრევენციისა და შემცირების მთელ რიგ მექანიზმებს.