სირიაში მცხოვრები 9,3 მილიონი ადამიანი, ანუ ქვეყნის მოსახლეობის 40% დახმარებას საჭიროებს. ამის შესახებ გაერს ჰუმანიტარული დახმარების კოორდინატორმა ვალერი ამოსმა განაცხადა. გაეროს მონაცემებით, სექტემბერში ეს ციფრი 6,8 მილიონს შეადგენდა.
ბი-ბი-სის ინფორმაციით, გაეროს უშიშროების საბჭოს სხდომაზე გამოსვლისას ამოსმა განაცხადა, რომ სირიის კრიზისი ღრმავდება.
მისივე თქმით, უშიშროების საბჭომ უნდა გამოიყენოს საკუთარი მაღალი ავტორიტეტი როგორც რეჟიმთან, ასევე ოპოზიციასთან მიმართებაში, რათა უზრუნველყოფილი იქნეს ჰუმანიტარული მისიით აღჭურვილი პირების საქმიანობა.
ქვეყანაში ივლისის შემდეგ 4,25 მილიონი ადამიანიდან 6,5 მილიონ ადამიანამდე გაიზარდა დევნილების რაოდენობა. ალყაშემორტყმულ, ე.წ. იზოლირებულ ქალაქებში 2,5 მილიონი ადამიანი იმყოფება, რომლებიც მწვავედ განიცდიან სხვადასხვა აუცილებელი პროდუქტებისა თუ მედიკამენტების დეფიციტს. 2,5 მიიონზე მეტმა ადამიანმა ქვეყანა დატოვა და თავი მეზობელ სახელმწიფოებს შეაფარა.
2011 წლის მარტიდან სირიაში მიმდინარე შეიარაღებულ დაპირისპირებას 100 ათასზე მეტი ადამიანი ემსხვერპლა.