ვენესუელაში 24 ივნისს მომხდარი ორი დამანგრეველი მიწისძვრის შედეგად დაღუპულთა რაოდენობა 1719-მდე გაიზარდა. დაშავებულია 22 ათასზე მეტი ადამიანი.

ინფორმაციას ავრცელებენ Associated Press და Bloomberg ვენესუელის ეროვნული ასამბლეის თავმჯდომარის, ხორხე როდრიგესის განცხადებაზე დაყრდნობით.

მისი თქმით, ამჟამად 22 619 დაშავებული სამედიცინო დახმარებას იღებს საავადმყოფოებში, საველე ჰოსპიტლებსა და სამედიცინო გადამოწმების პუნქტებში. უსახლკაროდ დარჩენილთათვის მთავრობამ 15 დიდი თავშესაფარი მოაწყო ლა-გუაირას შტატში, რომელიც ყველაზე მეტად დაზარალდა, და დამატებით 50 თავშესაფარი კარაკასის რეგიონში.

სტიქიის ზონაში მასშტაბური სამაშველო ოპერაცია გრძელდება. პროცესში ჩართულია 3 319 მაშველი სხვადასხვა ქვეყნიდან, 140 სპეციალურად გაწვრთნილი სამძებრო ძაღლი და 49 ერთეული ტექნიკა. ქვეყანაში უკვე ჩაიტანეს 700 ათას ტონაზე მეტი ჰუმანიტარული დახმარება.

გადარჩენილთა თქმით, ლა-გუაირას შტატის ერთ-ერთ სასტუმროში მიწისძვრის დროს იმყოფებოდა 100-ზე მეტი ადამიანი, რომლებიც ცოტა ხნით ადრე აშშ-დან დეპორტაციის შემდეგ ჩაიყვანეს. ამჟამად შენობის ნანგრევებში გადარჩენილებისა და დაღუპულების ძებნა გრძელდება.

ICE Flight Monitor-ის მონაცემებით, მაიამიდან დეპორტირებული ვენესუელელების რეისზე 146 ადამიანი იმყოფებოდა, მათ შორის 19 ქალი და 7 ბავშვი.

სამაშველო ჯგუფები კვლავ აგრძელებენ ძებნის ოპერაციას და ნანგრევებიდან ჯერ კიდევ პოულობენ გადარჩენილებს, მიუხედავად იმისა, რომ კრიტიკული 72-საათიანი პერიოდი უკვე გასულია.