უკრაინის პრეზიდენტი ვოლოდიმირ ზელენსკი, ზაპოროჟიეზე, დნიპროზე, ხერსონზე, ხარკოვზე, ასევე დონეცკისა და სუმის ოლქებზე რუსეთის იერიშებს გამოეხმაურა და განაცხადა, რომ უკრაინა თავდასხმებს მომავალშიც უპასუხებს ისე, რომ რუსეთის ომის გაგრძელების შესაძლებლობები შეასუსტოს.
ზელენსკის თქმით, ზაპოროჟიეში რუსმა სამხედროებმა FPV-დრონებისა და სხვა უპილოტო აპარატების გამოყენებით სამოქალაქო ობიექტებსა და ტრანსპორტზე „ნადირობა“ მოაწყვეს. მან ასევე „უკიდურესად სასტიკი და სრულიად უაზრო“ უწოდა დნიპროში სამოქალაქო საწარმოზე განხორციელებულ დარტყმას.
„რუსეთი უკრაინისა და უკრაინელების წინააღმდეგ ტერორისტულ ომს აგრძელებს. რა თქმა უნდა, ამ დარტყმებზე რუსეთს სრულიად სამართლიანად ვუპასუხებთ. ამას ისე ვაკეთებთ, რომ პირველ რიგში დაზიანდეს რუსეთის სახელმწიფო სისტემა და მისი შესაძლებლობა, ომი გააჭიანუროს,“ - განაცხადა ზელენსკიმ.
მისივე თქმით, რუსეთში ბენზინის დეფიციტიც ომისა და უკრაინის მიერ შორ მანძილზე განხორციელებული დარტყმების ერთ-ერთი შედეგია.
„ომის რეალობას რუსეთში ვაბრუნებთ და ყველაფერს ვაკეთებთ, რათა ჩვენი მიწის ოკუპაციის გაგრძელება მაქსიმალურად გავართულოთ,“ - აღნიშნა უკრაინის პრეზიდენტმა.
მან მადლობა გადაუხადა უკრაინელ სამხედროებს, რომლებიც თავდაცვას ინარჩუნებენ, განსაკუთრებით დონეცკის ოლქში, სადაც რუსეთის ყველაზე მეტი შეტევა ფიქსირდება. მან აღნიშნა, რომ სრულმასშტაბიანი ომის დაწყებიდან რუსეთმა უკვე 15-ჯერ გადადო დონეცკის ოლქის დაკავების ვადები.
გარდა ამისა, ზელენსკიმ დააანონსა აქტიური საერთაშორისო მუშაობა მომდევნო კვირებში და გამოთქვა იმედი პარტნიორების მხრიდან პოზიტიურ გადაწყვეტილებებზე.
„ივნისი–ივლისი უნდა იყოს შედეგიანი უკრაინისთვის, პირველ რიგში ჩვენი საერთო ძალისხმევისთვის უსაფრთხოების გარანტირების მიმართულებით. მშვიდობა საჭიროა,“ - განაცხადა ზელენსკიმ.
