51 წლის წინ, 1956 წლის 30 დეკემბერს საქართველოს ტელეხედვის სტუდია ეთერში გავიდა. შემოქმედებითმა ჯგუფმა ტელეანძის პატარა სტუდიიდან ეთერში ორსაათიანი გადაცემა გაიყვანა. დედაქალაქის ამბებისა და მილოცვების შემდეგ მაყურებელმა ტელეეთერით პირველად, მხატვრული ფილმი "აბეზარა" ნახა.
ერთწლიანი მზადებისა და ორთვიანი რეპეტიციების შემდეგ საღამოს რვა საათზე ტელევიზიის გახსნისადმი მიძღვნილი ტელეგადაცემა ლია მიქაძის მისალმებით გაიხსნა.
41 წელი გავიდა "მოამბის" დაარსებიდან. საინფორმაციო სამსახურმა ყოველდღიური მაუწყებლობა ტელევიზიის შექმნიდან ათი წლის შემდეგ დაიწყო. წლებთან ერთად იცვლებოდნენ დიქტორები თუ წამყვანები, იცვლებოდა საინფორმაციო გამოშვების სახელწოდებაც. დღეს კი საზოგადოებრივი მაუწყებლის ეთერში ახალი ამბები ყოველდღე იმ სახელწოდებით გადის, რომლითაც "მოამბემ" მაუწყებლობა წლების წინ დაიწყო.
წლების წინ, შაბათის დადგომას მთელი საქართველო მოუთმენლად ელოდა. საღამოს 10:30 საათზე მაყურებელი "ილუზიონის" საყურებლად ემზადებოდა. კინოშედევრების ჩვენება 16 წელი გაგრძელდა. ოთარ სეფიაშვილის საავტორო პროგრამას ალტერნატივა საბჭოთა კავშირში არ გააჩნდა.
კიდევ ერთი პროგრამა, რომელიც კომუნისტური ეპოქის ჩარჩოში არ ჯდებოდა და ხშირად პარტიის იდეალებსაც ეწინააღმდეგებოდა გადაცემა - "ეს ესტრადაა" იყო, სადაც უცხოურ მუსიკალურ კლიპებს აჩვენებდნენ.
წლების განმავლობაში მაყურებელი დიდ დაინტერესებას იჩენდა დავით ქლიბაძის საავტორო გადაცემისადმი "სპორტული კალედეისკოპი".
მრავალი გადაცმა ასიათასობით ადამიანში დღესაც ლამაზ მოგონებებსა და დადებით ემოციებს იწვევს.
