აშშ-ის სენატის დაზვერვის კომიტეტის თავმჯდომარემ, რესპუბლიკელმა სენატორმა ტომ კოტონმა განაცხადა, რომ რუსეთთან ომის დასრულების შესახებ შემდგომ მოლაპარაკებებს აზრი აღარ აქვს. მისი შეფასებით, კრემლის მოთხოვნა, რომ ნატო-ს წევრმა ქვეყნებმა საკუთარი საზღვრებიდან სამხედრო ძალები გაიყვანონ, აჩვენებს, რომ ვლადიმირ პუტინი სამშვიდობო შეთანხმების მიღწევას რეალურად არ ცდილობს.
ამის შესახებ კოტონმა სოციალურ ქსელ X-ზე დაწერა.
სენატორმა აბსურდული უწოდა რუსეთის მოთხოვნას, რომ ნატო-ს ქვეყნებმა საკუთარი ტერიტორიიდან და საზღვრებიდან სამხედრო ძალები გაიყვანონ.
„პუტინმა კიდევ ერთხელ დაამტკიცა, რომ მოლაპარაკებების გზით მშვიდობის მიღწევას სერიოზულად არ განიხილავს. ამ ეტაპზე შემდგომი მოლაპარაკებები ფარსია“, -- განაცხადა კოტონმა.
მისი აზრით, პუტინი ომის შეჩერებას მხოლოდ მაშინ დათანხმდება, როდესაც გააცნობიერებს, რომ გამარჯვებას ვერ შეძლებს.
სენატორის განცხადება რუსეთის იმ მოთხოვნებს უკავშირდება, რომლებიც მოსკოვმა უკრაინაში ომის დასრულების პირობად წამოაყენა და რომლებიც, მათ შორის, ნატოს აღმოსავლეთ ფლანგზე ალიანსის სამხედრო ყოფნის შემცირებას ითვალისწინებს.
„ჩვენ უნდა დავეხმაროთ უკრაინას, რომ მას ეს დაუმტკიცოს“, - დასძინა კოტონმა.
სენატორმა კომენტარი გააკეთა გამოცემა The New York Times-ის ინფორმაციაზე, რომლის თანახმადაც, უკრაინის წინააღმდეგ ომის დასრულების შესახებ აბუ-დაბიში გამართული მოლაპარაკებების დროს რუსეთმა კვლავ წამოაყენა მოთხოვნა, რომ ნატო-მ თავისი სამხედრო ძალები იმ პოზიციებზე გაიყვანოს, რომლებსაც ალიანსი 1997 წელს იკავებდა.
ეს მოთხოვნა თითქმის სიტყვასიტყვით იმეორებს მოსკოვის პოზიციას, რომელიც რუსეთმა უკრაინაში სრულმასშტაბიან შეჭრამდე ორი თვით ადრე, 2021 წლის დეკემბერში, გაახმოვანა. მაშინ რუსეთი ნატო-სგან აღმოსავლეთ ევროპაში სამხედრო ყოფნის შემცირებას და ალიანსის გაფართოების შეზღუდვას მოითხოვდა.
