როგორც აფხაზეთის მთავრობის თავმჯდომარემ ვახტანგ ყოლაიამ "ჯი-ეიჩ-ენთან" საუბრისას აღნიშნა, კანონის თანახმად, მას მინისტრთა კაბინეტის ახალი შემადგენლობის დაკომპლექტების და შემდგომ მისი უმაღლესი საბჭოსთვის წარდგენის ვადა დღეს 18:00 საათზე ეწურება, ამ მიმართულებით კონსულტაციები თიქთმის დასრულებულია და მინისტრთა კაბინეტის სავარაუდო წევრთა ვინაობა ხვალ გახდება ცნობილი.

"დღeს 18:00 საათამდე წარვუდგენ უმაღლეს საბჭოს მინისტრთა კაბინეტის ახალ შემადგენლობას. შემდეგ ისინი კომისიებში განიხილავენ, პირადად შეხვდებიან კანდიდატებს, შემდეგ საკითხი პრეზიდიუმზე გავა, შემდეგ სესიაზე განიხილება და ჩემს მიერ წარმოდგენილი კანდიდატების თაობაზე მხოლოდ ამის შემდეგ მიიღებს უმაღლესი საბჭო საბოლოო გადაწყვეტილებას,"- განაცხადა ვახტანგ ყოლბაიამ.

გავრცელებული ინფორმაციით, აფხაზეთის განათლების და კულტურის მინისტრის პოსტზე მსახიობის და სოხუმის დრამატული თეატრის ყოფილი ხელმძღვანელის დიმა ჯაიანის კანდიდატურა განიხილება, თუმცა აღნიშნული ინფორმაცია "ჯი-ეიჩ-ენთან" საუბრისას აფხაზეთის მთავრობის თავმჯდომარემ ვახტანგ ყოლბაიამ არც უარყო და არც დაადასტურა.

ცნობისთვის, 2013 წლის 11 სექტემბერს აფხაზეთის ავტონომიური რესპუბლიკის უმაღლესი საბჭოს სესიაზე მიღებული გადაწყვეტილების თანახმად, აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელს ვახტანგ ყოლბაიას ავტონომიური რესპუბლიკის კონსტიტუციის 112* მუხლში მიმდინარე წლის 20 აგვისტოს შეტანილი კონსტიტუციური ცვლილებების საფუძველზე, აფხაზეთის ავტონომიური რესპუბლიკის მთავრობის თავმჯდომარის ყველა უფლებამოსილება მიენიჭა.

ყოლბაიას აფხაზეთის უმაღლესი საბჭოსთვის აფხაზეთის ავტონომიური რესპუბლიკის ახალი მთავრობის შემადგენლობა დასამტკიცებლად 7 დღის ვადაში უნდა წარედგინა და ეს ვადა სწორედ დღეს იწურება.