მოვუწოდებთ მთავრობას, კურსი დაუყოვნებლივ შეცვალოს, საქართველოში პოლიტიკური თავისუფლებები აღადგინოს და დემოკრატიულ მმართველობას დაუბრუნდეს, - ამის შესახებ აშშ-ის სენატის საგარეო საქმეთა კომიტეტის თავმჯდომარის, სენატორ ჯიმ რიშისა (რესპუბლიკური პარტია) და კომიტეტის „დემოკრატების“ ლიდერის, ჯინ შაჰინის (დემოკრატიული პარტია) ერთობლივ განცხადებაშია ნათქვამი, რომელსაც სენატორები საქართველოში საპროტესტო აქციების წლისთავთან დაკავშირებით ავრცელებენ.
სენატორები განცხადებაში აღნიშნავენ, რომ ზუსტად ერთი წლის წინ საქართველოს თანამედროვე ისტორიაში ახალი, ბნელი თავი დაიწყო. ისინი პატივისცემას გამოხატავენ ქართველი ხალხის გამძლეობის მიმართ და ამბობენ, რომ ქართველი ხალხი იმსახურებს ხელისუფლებას, რომელიც პატივს სცემს მათ უფლებას, განსაზღვრონ თავიანთი ქვეყნის მომავალი.
"ერთი წლის წინ საქართველომ თანამედროვე ისტორიაში ახალი, ბნელი თავი დაიწყო. საარჩევნო კამპანიის დროს საქართველოს ევროპული ინტეგრაციის გაგრძელების დაპირების შემდეგ, რომელსაც ქართველი ხალხის აბსოლუტური უმრავლესობა მხარს უჭერდა, მთავრობამ პოზიცია შეცვალა და კონსტიტუციური ვალდებულება დაარღვია.
აღნიშნულის საპასუხოდ, ქართველები ქუჩებში გამოვიდნენ, ცვლილებების მოთხოვნით და მთავრობის მიერ ამომრჩევლების ხმების უგულებელყოფის წინააღმდეგ დემონსტრაციის მიზნით. ამის შემდეგ ერთი წლის განმავლობაში, საქართველოს ხელისუფლებამ ამომრჩეველთა შეშფოთებების მოსმენისა და ოპოზიციასთან მუშაობის ნაცვლად, მათ ჩასახშობად უპრეცედენტო ნაბიჯები გადადგა, ავტორიტარული კანონების მიღებით, პოლიტიკური ოპოზიციის წევრების დაკავებითა და აკრძალვით, სამოქალაქო საზოგადოების ლიდერების დაშინებით და აშშ-ისა და მისი საელჩოს თანამშრომლების წინააღმდეგ ცილისწამებით.
საქართველოში პოლიტიკური ძალადობის ესკალაციის გამო, ჩვენ სულ უფრო მეტად შეშფოთებულები ვართ საქართველოს მთავრობის მიერ საკუთარი ხალხის დევნით და ვაფასებთ ხალხის გამძლეობას. და როგორც ამერიკელები, აღფრთოვანებულები ვართ იმით, რომ ქართველი ხალხი უარს ამბობს თავისუფლების დათმობაზე ნებისმიერ ფასად.
როგორც საქართველოს ახლო მეგობრები, ჩვენ წლების განმავლობაში ვაკვირდებოდით ამ პოლიტიკურ მოვლენებს საქართველოში და ღრმად ვართ ჩართულნი ქვეყნის წარმატებაში. ქართველი ხალხი იმსახურებს ხელმძღვანელობას, რომელიც პატივს სცემს მათ უფლებას, განსაზღვრონ თავიანთი ქვეყნის მომავალი.
მოვუწოდებთ მთავრობას დაუყოვნებლივ შეცვალოს კურსი, აღადგინოს პოლიტიკური თავისუფლებები საქართველოში და დაუბრუნდეს დემოკრატიულ მმართველობას"- ნათქვამია განცხადებაში.
