კრემლში გამართული შეხვედრების შემდეგ, „სამშვიდობო მოლაპარაკებებში“ მონაწილე უკრაინის დელეგაციამ შეერთებულ შტატებში მოლაპარაკებებზე მოწვევა მიიღო.
ამის შესახებ ბრიუსელში ჟურნალისტებს საგარეო საქმეთა მინისტრმა ანდრიი სიბიჰამ განუცხადა.
სიბიჰამ, კერძოდ, განაცხადა, რომ უკრაინას ჯერ არ მიუღია მოსკოვში გამართული ამერიკა-რუსეთის მოლაპარაკებების დეტალები და აღნიშნა, რომ ამის ობიექტური მიზეზები არსებობს.
„უკრაინის დელეგაციის ხელმძღვანელს (რუსტემ უმეროვს) და სტივ უიტკოფს შორის კონტაქტი შედგა. მაგრამ რადგან ეს სატელეფონო კონტაქტი იყო, უსაფრთხოების მიზნით, ძნელი წარმოსადგენია ამ შეხვედრის დეტალების განხილვა, რადგან ეს მგრძნობიარე პროცესია“, - განმარტა მან.
აღნიშნული ინფორმაცია უკრაინულ მედიას ასევე დაუდასტურა ორმა ევროპელმა მინისტრმაც; მათი თქმით, არც მათ და არც ევროპელ ლიდერებს არ მიუღიათ დეტალური ინფორმაცია მოსკოვში გამართული მოლაპარაკებების შესახებ.
თუმცა, აშშ მზადაა, უკრაინელებს პირისპირ მოლაპარაკებების რაუნდის დროს დეტალები გაუზიაროს.
„ამერიკული დელეგაციის წარმომადგენლებმა განაცხადეს, რომ მათი შეფასებით, მოსკოვში გამართულმა მოლაპარაკებებმა დადებითი გავლენა მოახდინა სამშვიდობო პროცესზე. ეს მათი შეფასებაა. მათ უახლოეს მომავალში უკრაინული დელეგაცია ამერიკაში მიიწვიეს ჩვენი დიალოგის გასაგრძელებლად“, - თქვა სიბიჰამ.
უკრაინის დელეგაციის ხელმძღვანელი, რუსტემ უმეროვი, ამჟამად ბრიუსელში იმყოფება, სადაც მან შეხვედრა გამართა ევროპის ძირითადი სახელმწიფოების ლიდერების უსაფრთხოების მრჩევლებთან.
