ნიგერიის შეიარაღებული ძალების მიერ გატარებული რამდენიმე წარმატებული ოპერაციის შემდეგ ისლამისტური დაჯგუფება „ბოკო ჰარამის" ბოევიკები ქვეყნის ტერიტორიას მასობრივად ტოვებენ. ამის შესახებ ინფორმაციას ბი-ბი-სი ავრცელებს.
ნიგერიის არმიის სამხედრო შტაბის მიერ გავრცელებული ინფორმაციის თანახმად, შეიარაღებულმა ძალებმა ოპერაციის დროს 14 ბოევიკის ლიკვიდაცია მოახდინეს, ხოლო დაჯგუფების 20 წევრი დააპატიმრეს. შეიარაღებული შეტაკებისას ნიგერიის არმიის სამი ჯარისკაცი დაიღუპა.
ამერიკის შეერთებული შტატების სახელმწიფო მდივანი ჯონ კერი ნიგერიის ხელისუფლებას მოუწოდებს, ოპერაციის ფარგლებში თავშეკავებულობა არ დაკარგოს და არ დაუშვას წამება და მკვლელობა სასამართლოს გარეშე.
შეგახსენებთ, რომ ბოევიკების იერიშირების საფრთხის თავიდან აცილების მიზნით, ნიგერიის პრეზიდენტმა გუდლაკ ჯონათანმა ქვეყნის ჩრდილო-აღმოსავლეთით მდებარე სამ შტატში საგანგებო მდგომარეობა გამოაცხადა და სამივე შტატში ქვეყნის შეიარაღებული ძალების დისლოცირების ბრძანება გასცა.
ისლამისტური დაჯგუფება „ბოკო ჰარამი" ქვეყნის ჩრდილოეთით მოქმედებს, სადაც მოსახლეობის ძირითადი ნაწილი მუსულმანები არიან. დაჯგუფება ქვეყნის მთელ ტერიტორიაზე შარიათის კანონების გავრცელებისკენ ისწრაფვის და სურს, ნიგერია დასავლური ცივილიზაციის ელემენტებისგან გაწმინდოს. „ბოკო ჰარამი" დგას თითქმის ყველა ტერორისტული აქტის უკან, რომელიც უკანასკნელ პერიოდში ნიგერიაში განხორციელდა. ბოევიკების იერიშების შედეგად საერთო ჯამში 2 ათასამდე ადამიანი დაიღუპა.