სვანეთის განვითარების მიზნით სამთავრობო კომისია შეიქმნა. მთავრობის დღევანდელ სხდომაზევე განისაზღვრა კომისიის შემადგენლობაც.
როგორც ეკონომიკის განვითარების მინისტრმა ზურაბ პოლოლიკაშვილმა ჟურნალისტებს განუცხადა, კომისიის წევრები მის გარდა ტურიზმის დეპარტამენტის ხელმძღვანელი, მესტიის გამგებელი, რეგიონში პრეზიდენტის რწმუნებული, ფინანსთა მინისტრის და რეგიონალური განვითარების მინისტრების მოადგილეები იქნებიან.
"კომისიის მიზანია კოორდინირებული იყოს ყველა ამ სტრუქტურის მუშაობა და ერთობლივად მოხდეს იმ გეგმის განხორციელება, რომელსაც მესტიის განვითარებისთვის შევიმუშავებთ", - განაცხადა პოლოლიკაშვილმა, რომლის განმარტებითაც, კომისიას შესაბამისი სამუშაო გეგმის შემუშავებაში შვეიცარიელი, ავსტრიელი და იტალიელი კონსულტანტები დაეხმარებიან.
ამასთან, მინისტრის განმარტებით, გეგმა მესტიაში თანამედროვე, ევროპული სტანდარტების კურორტის მოწყობას ითვალისწინებს.
"ეს კურორტი იმით იქნება უნიკალური, რომ მას სეზონურობა არ ექნება და იქ დასვენება ტურისტებს წლის ნებისმიერ დროს შეეძლება. ასეთი კურორტები მხოლოდ ავსტრიაში, შვეიცარიაში, კანადასა და ახალ ზელანდიაში არსებობს", - განმარტა მინისტრმა.
აღსანიშნავია, რომ მესტიაში თანამედროვე სტანდარტების კურორტის მოწყობა 2-3 წლის ვადაში უნდა დასრულდეს.