ძლიერი ქარის შედეგად თბილისის ელექტრომომარაგებაში 22 თებერვალს შექმნილი პრობლემები "თელასმა" ოპერატიულად მოაგვარა. ქალაქის სხვადასხვა უბანში დაფიქსირებული ხანმოკლე შეფერხებები 22 საათისთვის მთლიანად აღმოიფხვრა.
გუშინდელი მდგომარეობით, მაღალი ძაბვის გამანაწილებელ ქსელზე გაბარიტების დარღვევის გამო ავარიულად გამოირთო ცამეტი 110-კვტ-იანი გადამცემი ხაზი, რისი მიზეზიც ქარისგან წაქცეული ხეები გახდა. დაზიანებული გადამცემი ხაზებიდან სარეზერვო ხაზებზე ძაბვის გადატანა კომპანიის მიერ დროის ხანმოკლე პერიოდში მოხერხდა. შესაბამისად, თბილისის 50 ათასამდე აბონენტს ელექტრომომარაგება მხოლოდ მოკლე ინტერვალების სახით შეუწყდა. `თელასის" საავარიო და სადისპეჩერო სამსახურების ოპერატიული ქმედების შედეგად დროულად განხორციელდა გამანაწილებელი ქვესადგურების 6-10 კილოვოლტის 40-მდე გამანაწილებელ უჯრედზე მომხდარი ტექნიკური ინციდენტის აღდგენის პროცესიც.
დაბალი ძაბვის გამანაწილებელ ქსელზე დაზიანების მხოლოდ 2 შემთხვევა დაფიქსირდა. კომპანიის ექსპლუატაციის სამსახურს 0,4 კილოვოლტი ძაბვის გადამცემ ხაზებზე ელექტროენერგიის შეწყვეტა მხოლოდ უსაფრთხოების ნორმების დაცვის მიზნით მოუწია. ნაძალადევის რაიონში წაქცეული საყრდენი ბოძის აღდგენა 2 საათში მოხერხდა, ხოლო სიონის ქუჩაზე ელექტროსადენებზე დაცემული სახურავისგან გამოწვეული დაზიანება დღეს 14 საათისთვის გამოსწორდება.
ამჟამად თბილისის Yყველა რაიონი ელექტროენერგიას შეუფერხებლად იღებს. ორ დაზიანებულ 110 კილოვოლტიან ხაზს `თელასი" დღის ბოლომდე აღადგენს.