ეკონომიკის სამინისტროს ორგანიზებით კონკურენციის კანონპროექტის საჯარო განხილვა გაიმართა.
ეკონომიკისა და მდგრადი განვითარების მინისტრის მოადგილის, ნათია მიქელაძის განმარტებით, საქართველოს მთავრობამ, ევროპის საუკეთესო პრაქტიკაზე დაყრდნობით და ექსპერტების ჩართულობითა და მხარდაჭერით, „თავისუფალი ვაჭრობისა და კონკურენციის" კანონში ცვლილების პროექტი უკვე შეიმუშავა, რომელიც უახლოეს პერიოდში პარლამენტს წარედგინება.
„ჩვენი მიზანია, არსებული კანონის სრულყოფა და გადამუშავება იმ კუთხით, რომ კანონმდებლობა იყოს უფრო სამართლიანი და აღსრულებადი. იგი თანაბრად უნდა იცავდეს ბიზნესის ინტერესებსა და კონკურენციას", - განაცხადა ნათია მიქელაძემ, დღეს "შერატონ მეტეხი პალასში" გამართულ მრგვალ მაგიდაზე, რომლის თემაც „კონკურენციის კანონმდებლობა და პოლიტიკა" იყო.
"მრგვალი მაგიდის" მსვლელობისას განხილული იყო ასევე კონკურენციის კანონმდებლობა და პოლიტიკის თაობაზე საუკეთესო პრაქტიკა და გამოცდილება. მათ შორის, კარტერული შეთანხმებები, დომინირებული მდგომარეობის ბოროტად გამოყენება, კონცენტრაციის კონტროლი, თანამშრომლობის პროგრამა (leniency program) და კონკურენციის სააგენტოების ეფექტიანობა.
აღსანიშნავია, რომ კონკურენციის თემაზე მრგვალი მაგიდა გაიმართა საქართველოს ეკონომიკისა და მდგრადი განვითარების სამინისტროს, GIZ-ის (გერმანიის საერთაშორისო თანამშრომლობის საზოგადოება), საქართველოში ევროგაერთიანების წარმომადგენლობის, საერთაშორისო გამჭვირვალობა - საქართველოს (TI), საქართველოს განვითარების კვლევითი ინსტიტუტის (GDRI), შვედეთის საერთაშორისო განვითარების სააგენტოს (SIDA) და საქართველოში პოლონეთის საელჩოს ორგანიზატორობითა და პარტნიორობით.
შეხვედრას დაესწრნენ საქართველოს მთავრობის, საქართველოს პარლამენტის და ბიზნესის წარმომადგენლები, ექსპერტები აკადემიური წრეებიდან და სხვა დაინტერესებული პირები საქართველოდან, სომხეთიდან, გერმანიიდან, შვედეთიდან და პოლონეთიდან.