10-12 მაისს, ბათუმში დაგეგმილ საერთაშორისო ტურისტულ გამოფენა -"Expo-Batumi 2013"-ში მონაწილეობას 100-მდე კომპანია მიიღებს. როგორც გამოფენის ორგანიზატორებმა სააგენტო "ჯი-ეიჩ-ენს" განუცხადეს, გამოფენაში მონაწილეობის მისაღებად კომპანიები 10 ქვეყნიდან ჩამოვლენ და საგამოფენო სივრცე 1800 კვ/მ ფართობზე იქნება განთავსებული. გამოფენას წელსაც ბათუმის ყინულის სასახლე უმასპინძლებს, თუმცა სამომავლოდ ბათუმში სპეციალიზებული საგამოფენო სივრცის მოწყობაა დაგეგმილი, რომელიც ახალ ბულვარში განთავსდება და სხვადასხვა ადგილობრივ თუ საერტაშორისო გამოფენებს უმასპინძლებს. გამოფენის ორგანიზატორთა მტკიცებით, "Expo-Batumi 2013" გასული წლების შედარებით საკმაოდ მასშტაბული იქნება.
შეგახსენებთ, რომ ტურიზმისა და სასტუმრო აღჭურვილობის მეექვსე საერთაშორისო გამოფენის "Expo-Batumi 2013"-ის ორგანიზატორი კომპანია GeoNetExpo-ა. Geo Net Expo საქართველოში ერთ-ერთი პირველი საგამოფენო კომპანიაა და ბათუმში გამოფენების ორგანზებით, ხელს უწყობს რეგიონში გამოფენების განვითარებას. როგორც კომპანიის მენეჯმენტი განმარტავს, Geo Net Expo-ს მიზანია ბათუმში საერთაშორისო გამოფენის ორგანიზება, სადაც კომპანიებს საშუალება მიეცემათ აღმოაჩენონ პოტენციური პარტნიორები და ტურისტულმა კომპანიებმა ახალი ურთოერთობები დაამყარონ.