10 აპრილს, საქართველოს ფინანსთა მინისტრმა, ნოდარ ხადურმა გასვლითი შეხვედრა გამართა არაალკოჰოლური სასმელების მწარმოებელი კომპანიების წარმომადგენლებთან. შეხვედრაზე განიხილეს არააქციზური პროდუქციის ელექტრონულ მარკირებასთან დაკავშირებული საკითხები.

ამგვარი დიალოგის მიზანია, საბოლოო გადაწყვეტილების მიღებამდე ფინანსთა სამინისტრომ მოისმინოს ყველა დაინტერესებული მხარის წინადადებები და შენიშვნები.
ბორჯომში შეხვედრას დაესწრნენ არაალკოჰოლური სასმელების მწარმოებელთა ასოციაციაში შემავალი კომპანიების წარმომადგენლები.

,,პირველი და მნიშვნელოვანი არის ის, რომ დღეს არ შევკრებილვართ გადაწყვეტილების მისაღებად. ჩვენ მივიღეთ ინფორმაცია, შევთანხმდით, რომ გავაგრძელებთ თანამშრომლობას, გადავდივართ სხვა ეტაპზე. კომპანიები მზად არიან წარმოგვიდგინონ ფინანსური ინფორმაცია იმისათვის, რათა ჩვენ მივიღოთ ობიექტური გადაწყვეტილება. მნიშვნელოვანია, რომ გადაწყვეტილების მიღების პროცესი არის გამჭვირვალე, მჭიდრო თანამშრომლობა გვაქვს ბიზნესთან და ვფიქრობ, რომ მივიღებთ საინტერესო გადაწყვეტილებას და გადავჭრით სამ მნიშვნელოვან პრობლემას: პროდუქცია არ გაძვირდება მარკირების გამო, ბიზნესს არ გაუჩნდება დამატებითი ბარიერები და აღრიცხვა იქნება მოწესრიგებული" - განაცხადა საქართველოს ფინანსთა მინისტრმა ნოდარ ხადურმა შეხვედრის დასრულების შემდეგ.

ფინანსთა მინისტრმა, ნოდარ ხადურმა დაათვალიერა ბორჯომის N1 და N2 ჩამომსხმელი ქარხნები. ასევე, მოინახულა ,,ბორჯომის მინერალური წყლის ჭაბურღილი".
ბორჯომში მიღებული შეთანხმებით ფინანსთა მინისტრი მოინახულებს არაალკოჰოლური სასმელების მწარმოებელ კომპანიებსაც.

ეს იყო ფინანსთა მინისტრის რიგით მეორე შეხვედრა არაალკოჰოლური სასმელების მწარმოებელი კომპანიების წარმომადგენლებთან. ფინანსთა მინისტრი არაალკოჰოლური სასმელების მწარმოებელი კომპანიების წარმომადგენლებს შეხვდა 25 თებერვალს, რომლის დროსაც მიღებული შეთანხმებით ელექტრონულ მარკირებას დაქვემდებარებული პროდუქციის დადგენის ვადამ 1 მაისამდე გადაიწია.