ირანული კომპანია "IRAN-UROMYEH"-ს საქართველოში ინვესტირებითაა დაინტერესებული. კომპანიის მფლობელმა და ხელმძღვანელმა სამიდ ტალატიმ აჭარაში ოფიციალური შეხვედრები უკვე გამართა. ინვესტორი აჭარაში სასტუმრო-კომპლექსების, საყოფაცხოვრებო ნარჩენების გადამამუშავებელი ქარხნის მშენებლობითაა დაინტერესებული. გარდა ამისა, კომპანია მზად არის აღადგინოს და ააღორძინოს სოფლის მეურნეობის ისეთი მნიშვნელოვანი დარგი, როგორიც მეჩაიეობაა. პროექტი ითვალისწინებს არა მარტო ქართული ჩაის მოყვანას, არამედ მის ექსპორტირებასა და რეალიზებას უცხოეთის ბაზრებზე.
აჭარის უმაღლესი საბჭოს ინფორმაციით, საბჭოს თავმჯდომარემ ავთანდილ ბერიძემ, დღეს ირანელი ინვესტორი მიიღო. გაცნობითი ხასიათის შეხვედრას საქართველოს პარლამენტის ვიცე-სპიკერი, ბათუმის მაჟორიტარი დეპუტატი საქართველოს პარლამენტში მურმან დუმბაძე და უმაღლესი საბჭოს აგრარული და თვითმმართველობის საკითხთა კომისიის თავმჯდომარე ანზორ თხილაიშვილი ესწრებოდნენ. კიდევ ერთი საინვესტიციო წინადადება, რომელზეც სამიდ ტალატმა ქართველ კანონმდებლებთან შეხვედრაზე ისაუბრა, ქობულეთსა და ხელვაჩაურში ხილის შესანახი ორი მაცივარ-ქარხნის მშნებელობაა.
„ეს კომპანია სოლიდური ინვესტიციის განხორციელებას აპირებს აჭარაში და ვიწონებთ ამ წინადადებებს. ჩვენი პოლიტიკური ნებაა მხარი დავუჭიროთ ინვესტიციების შემოსვლას ქვეყანაში და ამიტომაც კეთილგანწყობით ვეგებებით იმ ინვესტორებს, რომელთა მისწრაფებებიც თანხვედრია საქართველოს, აჭარის ხელისუფლების მიზნებთან და გეგმებთან", - განაცხადა აჭარის უმაღლესი საბჭოს თავმჯდომარემ ავთანდილ ბერიძემ
"IRAN-UROMYEH"-ის წარმომადგენლები საქართველოს პრემიერ-მინისტრთან ბიძინა ივანიშვილთან შეხვედრას გეგმავენ.
შეგახსენებთ, რომ მსოფლიოში ცნობილ, მრავალპროფილიან კომპანია "IRAN-UROMYEH"-ს სხვადასხვა მნიშვნელოვანი პროექტი უკავშირდება, კერძოდ,მან აღადგინა და ააშენა ერაყში ომის დროს დანგრეული რამდენიმე ქალაქის ახალი დასახლებები. "IRAN-UROMYEH"-მა ასევე სახელი გაითქვა სოფლის მეურნეობის, გადამამუშავებელი მრეწველობის, ეკოლოგიური უსაფრთხოების და სხვა სფეროებშიც.
მასალის გამოყენების პირობები
