საქართველოს პრემიერ-მინისტრი ბიძინა ივანიშვილის განცხადებით, მეორე-მესამე წელი საქართველოს ეკონომიკისათვის გარდამტეხი იქნება.
როგორც მან დღეს რეგიონული მედიის წარმომადგენლებთან შეხვედრისას აღნიშნა, 4-5 თვე ძალიან ცოტა დროა, იმისათვის, რომ თითოეულ ოჯახამდე მივიდეს ყველა ის შედეგი, რასაც ხელისუფლება გეგმავს.
"გარწმუნებთ, რომ მეორე-მესამე წელიწადს იქნება ეკონომიკის გარდატეხა. ამის გასაღები ერთადერთია - სანამ დასაქმება და ადგილებზე ღირსეული შემოსავლების მიღება არ მოხერხდება, მანამ არაფერს არ ეშველება. ტერიტორიული მთლიანობის აღდგენის გასაღებიც კი აქაა", - განაცხადა პრემიერმა.
მისი თქმით, საქართველო ეკონომიკურად ძლიერი ქვეყანა უნდა გახდეს, რათა საკუთარ სამშობლოში ყველამ საკუთრი ოჯახის რჩენა შეძლოს.
ივანიშვილის განცხადებით, ყველაზე დიდი უსამართლობას, რომელიც წლების განმავლობაში ფორმირდებოდა, რამდენიმე თვე არ ეყოფა.
"მას უნდა რამდენიმე წელიწადი უკეთეს შემთხვევაში, რომ ეს ძირეულად გადატყდეს. მეორე წელი იქნება უკეთესი, მესამეზე უკვე იგრძნობს საზოგადოება ამას და სალაპარაკოდ გვექნება ჩვენი შედეგები. eკონომიკას დრო სჭირდება. ეს არ არის მარტივი პროცესი, რომ ინვესტიცია შემოვიდეს, მერე განხორციელდეს, მერე მოსახლეობა დასაქმდეს", - აღნიშნა ივანიშვილმა.
პრემიერის განცხადებით, ჩვენ ჩვენს სამშობლოს დავიბრუნებთ და დავიბრუნებთ ყველას, ვინც ქვეყნიდან წასულია ვინც დღესაც ჩემოდნებზეა.
