საეჭვო ტენდერის გასაჩივრება ამიერიდან მთლიანად ელექტრონული ფორმით მოხდება. როგორც დღეს კონკურენციისა და სახელმწიფო შესყიდვების სააგენტოს თავმჯდომარემ ტატო ურჯუმელაშვილმა განაცხადა, თუ კი გაჩნდება რაიმე საფუძვლიანი ეჭვი ტენდერის პირობებთან დაკავშირებით, შესაძლებელი ხდება მისი ელექტრონული ფორმით გასაჩივრება.
დავების საბჭოს მოდერნიზებული მოდულის ამოქმედების შემდეგ, ნებისმერი პირი, რომელსაც მიაჩნია ტენდერის შესაჩერებლად საკმარისი საფუძველი აქვს, ამას ღილაკზე თითის ერთი დაჭერით შეძლებს - ყველას შეუძლია გაასაჩივროს ტენდერი.
ტატო ურჯუმელაშვილის განმარტებით, სახელმწიფო შესყიდვების ერთიანი ელექტრონული სისტემა სრულიად გამჭვირვალეა - ყველა ყველაფერს ხედავს. მისივე თქმით, საბჭო რეალურად 2011 წელს შეიქმნა, თუმც ამიერიდან საჩივრის შეტანა მთლიანად ელექტრონული ფორმით მოხდება. ურჯუმელაშვილის ინფორმაციით, დღემდე საბჭოს 211 საჩივარი აქვს განხილული, საიდანაც 50 %-ზე მეტი დააკმაყოფილა კიდეც. აღსანიშნავია, რომ საჩივრების რაოდენობამ 2013 წლის იანვრიდან საგრძნობლად მოიმატა.
"დავების საბჭო 2011 წლიდან ფუნქციონირებს, თუმცა დღეს ჩვენ უკვე გვაქვს სახელმწიფო შესყიდვების დავების განხილვის ელექტრონული მოდელის გაუმჯობესებული ვერსიის პრეზენტაცია. განსხვავებით წინა ვერსიისგან, საერთოდ გამორიცხულია ქაღალდის გამოყენება. არის უკიდურესად მარტივი და რამდენიმე მოძრაობით, ანუ ღილაკზე დაჭერით შესაძლებელია ტენდერის გასაჩივრება და ამ ტენდერის შეჩერება. შეჩერება ხდება 10 სამუშაო დღის პერიოდით და ამ ხნის განმავლობაში დავების განხილვის საბჭოს მიერ აღნიშნული საჩივრის განხილვა მოხდება. დავების განხილვის საბჭო შედგება 6 წევრისგან და აქედან 3 წევრი სამოქალაქო საზოგადოების წარმომადგენელი იქნება. ყველაფერი ეს ხდება ელექტრონულად და რეალურ რეჟიმში ამ სერვისით სარგებლობა შესაძლებელია სააგენტოს ვებ-გვერდით. ამ დროისათვის საბჭოს მიერ განხილულია 211 საჩივარი, თუმცა 2013 წლის სტატისტიკა საჩივრების ზრდის მკვეთრ ტენდენციაზე მიუთითებს"- განმარტავს ტატო ურჯუმელაშვილი.
სიახლეს მიასალმება ბიზნესიც, რომელიც აცხადებს, რომ აღნიშნული სერვისი სააგენტოს მხრიდან ერთ-ერთი წინგადადგმული ნაბიჯია.
"ეს არის კიდევ ერთი წინ გადადგმული ნაბიჯი მთავრობის მიერ, რომ სახელმწიფო შესყიდვები გახდეს კიდევ უფრო გამჭვირვალე. ეს კი იმას ნიშნავს, რომ ფული უფრო ეფექტურად დაიხარჯება, ბიუჯეტში მეტი თანხა გამონთავისუფლდება იმისათვის, რომ სხვა მნიშვნელოვანი პროექტებისათვისაც დაიხარჯოს. სერვისის გაუმჯობესებაზე შესყიდვების სააგენტო ყოველთვის მუშაობდა, თუმცა დღეს უკვე ვხედავთ რომ რეფორმებს კიდევ უფრო მეტი ინტენსიურობით აგრძელებენ, რაც მისასალმებელია ბიზნესისათვის და მისასალმებელია მთავრობის მხრიდანაც. ეს კი ნიშნავს იმას მეტი საქმის გაკეთებას ნაკლები ფული" აცხადებს Japan Tobacco International-ის კორპორაციული საკითხებისა და კომუნიკაციების დირექტორი ნიკოლოზ მჭედლიშვილი.
საერთაშორისო გამჭვირვალობა - საქართველოს წარმომადგენელი კახა ურიადმყოფელი დადებითად აფასებს დავების განხილვის საბჭოს საქმიანობას და აცხადებს, რომ დავების საბჭოს შექმნამ ხელი შეუწყო არა მხოლოდ შესყიდვებში მონაწილე სუბიექტების უფლებების დაცვას, არამედ უფრო გამჭვირვალე გახდა შესყიდვების პროცესი.
"ტენდერის მიმდინარეობის ნებისიმერ ეტაპზე დაინტერესებულ მხარეს შეუძლია გაასაჩივროს შესყიდვის პროცედურასთან დაკავშირებული სხვადასხვა საკითხი. როგორც სტატისტიკა აჩვენებს, ამ მხრივ აქტიურობა დროთა განმავლობაში უფრო და უფრო იზრდება.
