13 მარტს, საქართველოს ფინანსთა მინისტრმა, ნოდარ ხადურმა მონაწილეობა მიიღო საქართველო-ისრაელის ბიზნესფორუმში, რომლის გახსნასაც სასტუმრო "ჰოლიდეი ინში" საქართველოს პრემიერ-მინისტრი ბიძინა ივანიშვილი დაესწრო. ორდღიან ფორუმში „Georgian Gateway-2013" ისრაელის 25 კომპანიის 60-ზე მეტი წარმომადგენელი მონაწილეობს. ისრაელის დელეგაცია მრეწველობის, სოფლის მეურნეობის, კომუნიკაციებისა და ფარმაცევტულ დარგში მომუშავე კომპანიებისგან და ინვესტორებისგან შედგება. საქართველოში ამ ეტაპზე ისრაელის 50 კომპანია მუშაობს. ფორუმის მონაწილეებს სიტყვით პრემიერ-მინისტრმა ბიძინა ივანიშვილმა მიმართა. მისი თქმით, მოხარულია, რომ მეზობელი ქვეყნის ბიზნესმენები საქართველოში ასეთი დიდი რაოდენობით ჩამოვიდნენ. „ებრაელები განსაკუთრებულები არიან ბიზნესაქტიურობით და ბიზნესში წარმატებითაც. თუ შევძლებთ, რომ საქართველოში მრავლად იყოს წარმოდგენილი ბიზნესი ისრაელიდან, ეს იქნება ჯანსაღი გარემო, ლაკმუსის ქაღალდი. ამავდროულად, ჩვენი ეკონომიკა პრაქტიკულად აუთვისებელია და ეკონომიკის აღორძინება საქართველოში საწყის ეტაპზეა, ამიტომ ბიზნესმენმა აქ ბიზნესის დასაწყებად განსაკუთრებული სიიოლე შეიძლება მოიპოვოს. მთელი მთავრობა მოწოდებულია იმისთვის, რომ მოვიზიდოთ ინვესტიციები, რამეთუ მხოლოდ ეკონომიკის აღორძინებით მიიღწევა ქვეყნის კეთილდღეობა. ჩვენ ყველა პირობას შევქმნით იმისთვის, რომ თქვენ ბიზნესი აწარმოოთ საქართველოში", -მიმართა ბიძინა ივანიშვილმა ფორუმის მონაწილეებს. „ძალიან დიდია ინტერესი ებრაელი ბიზნესმენების მხრიდან საქართველოს მიმართ და ამას ადასტურებს თუნდაც დღევანდელი ღონისძიება. დიდი იმედი გვაქვს, რომ ეს დაინტერესება დიდ ინვესტიციებში გადაიზრდება საქართველოში," - განაცხადა ფინანსთა მინისტრმა ნოდარ ხადურმა. საქართველო-ისრაელის ბიზნესფორუმი ისრაელის საელჩოს, BDO საქართველოს, BDO ისრაელისა და Georgian Gateway-ს ორგანიზებით იმართება
მასალის გამოყენების პირობები
