"ნავთობპროდუქტების ბუნებრივი დანაკარგის ნორმების დამტკიცების შესახებ" დადგენილებაში ცვლილებების შეტანა იგეგმება. როგორც ფინანსთა მინისტრი ნოდარ ხადური განმარტავს, ნავთობპროდუქტების ბუნებრივი დანაკარგის ნორმების დადგენის წესში არის გარკვეული პრობლემები, რაზეც ბიზნესმა სამინისტროს საქმის კურში უკვე ჩააყენა.
"მიღებული იყო ბრძანება, რომლის მიხედვითაც დადგენილი იყო ნავთობპროდუქტების დანაკარგის ნორმები. თუმცა როგორც ნავთობიმპორტიორები ამბობენ, არის გარკვეული ტექნიკური პრობლემები, რომელსაც არ ითვალისწინებს ეს ბრძანება. მაგალითისთვის გეტყვით, აღრიცხვა ხდება ტონობით, ხოლო გაყიდვა ხდება ლიტრობით. ტონა და ლიტრი ერთმანეთს არ ემთხვევა, რადგანაც სხვადასხვა ტემპერატურაზე, 1 ტონა არის ან 1200 ლიტრი, ან 1300 ლიტრი და ასე შემდეგ. ამ მიმართულებით არსებობს მსოფლიო გამოცდილება და ჩვენ ვსწავლობთ ამ გამოცდილებას, რათა არ შევქმნათ ბარიერები და პრობლემები ამ ბიზნესისათვის"- აცხადებს ნოდარ ხადური.
აღსანიშნავია, რომ 2011 წლის 24 მაისს საკანონმდებლო მაცნეში გამოქვეყნებული დებულება ნავთობპროდუქტების ბუნებრივი დანაკარგის ნორმების შესახებ ადგენს ნავთობპროდუქტების რეზერვუარში მიღების, შენახვისა და ტრანსპორტირებისას დანაკარგების მაქსიმალურ ზღვრულ ნორმებს, რომლებიც გამოიყენება მხოლოდ ნავთობ¬პროდუქტების ფაქტობრივი დანაკლისის შემთხვევაში.
