თებერვალში ნაერთი ბიუჯეტის საგადასახადო შემოსავლებმა 408,3 მლნ ლარი შეადგინა, რაც 12.0 მლნ ლარით აღემატება გასული წლის ანალოგიური პერიოდის მაჩვენებელს;

იანვარ-თებერვალში სახელმწიფო ბიუჯეტის საგადასახადო შემოსავლების კუთხით მობილიზებულმა თანხამ 844,0 მლნ ლარი შეადგინა, რაც 19,3 მლნ ლარით აღემატება 2012 წლის ანალოგიურ მაჩვენებელს;

2013 წლის თებერვალში სახელმწიფო ბიუჯეტის საგადასახადო შემოსავლებმა შეადგინა 395,0 მლნ ლარი, რაც 10,9 მლნ ლარით მეტია გასული წლის თებერვლის მაჩვენებელზე.

"2013 წლის თებერვალში საკონტროლო-სალარო აპარატებით ამორტყმული ჩეკების რაოდენობამ თითქმის 2 მილიონით გადააჭარბა გასული წლის თებერვლის მონაცემებს, ხოლო აღნიშნული ჩეკებით გადახდილი თანხის მოცულობა დაახლოებით 150 მილიონი ლარით აღემატება გასული წლის ანალოგიური პერიოდის მაჩვენებელს.
აღნიშნული მონაცემები ადასტურებს, რომ ქვეყანაში ბიზნესის, მათ შორის, საშუალო და მცირე საწარმოთა ბრუნვის ზრდის ტენდენციაა და მატულობს გაყიდვების მოცულობა"- განაცხადა ნოდარ ხადურმა.

მინისტრის ინფორმაციითვე, 2013 წლის თებერვალში გასული წლის ანალოგიურ პერიოდთან შედარებით 10.5%-ით გაზრდილია ექსპორტის მაჩვენებელი, იანვარში კი 27%-ით.

როგორც ცნობილი გახდა, ფინანსთა მინისტრის ნოდარ ხადურის საფრანგეთში სამუშაო ვიზიტის ფარგლებში: შეხვედრები გაიმართა საფრანგეთის განვითარების სააგენტოში, საფრანგეთის ბიზნეს-კონფედერაციაში, პარიზის სავაჭრო-სამრეწველო პალატაში, კომპანია COFACE-ის გენერალურ დირექტორთან, „სოსიეტე ჟენერალის" ხელმძღვანელობასთან, ეკონომიკური თანამშრომლობისა და განვითარების ორგანიზაციაში. აღნიშნულ შეხვედრებზე მიღწეული შეთანხმებით, დაწყებულია აქტიური მუშაობა საქართველოში საფრანგეთის განვითარების სააგენტოს წარმომადგენლობის გახსნისთვის, წლის განმავლობაში მოხდება ფრანგი და ქართველი საქმიანი წრეების წარმომადგენელთა ერთობლივი შეხვედრების ორგანიზება, საბანკო ჯგუფის „სოსიეტე ჟენერალის" მხრიდან გამოითქვა სურვილი გაფართოვდეს ჯგუფის საქმიანობა საქართველოში და სხვა.

პრემიერ-მინისტრის, ბიძინა ივანიშვილის დავალებით, ფინანსთა, ეკონომიკისა და მდგრადი განვითარების სამინისტროებმა ქვეყნის სტრატეგიის ამსახველი დოკუმენტის შედგენაზე დაიწყეს მუშაობა.
დოკუმენტში საუბარი იქნება ქვეყნის განვითარების გრძელვადიან სტრატეგიაზე და მიიღება საზოგადოების აქტიური ჩართულობის გზით;

დავების განხილვის საბჭოში მიმდინარე რეფორმების შესახებ სპეციალური პრეზენტაციის შედეგად:
საზოგადოება გაეცნო ფინანსთა სამინისტროს ახალი ხელმძღვანელობის პოლიტიკას დავების განხილვის საბჭოს გამჭვირვალობისა და საჯაროობის მიმართულებით, ასევე ახალ მიდგომებს, რომელიც გამოიყენება დავების განხილვის საბჭოს მიერ გადაწყვეტილებების მიღების დროს.
მოხდა განახლებული დავების განხილვის საბჭოს ოფიციალური ვებ-გვერდის http://www.taxdisputes.gov.ge/ პრეზენტაცია, სადაც ქვეყნდება დავების განხილვის საბჭოს მიერ მიღებული გადაწყვეტილებები.
67%-ზე მეტი გადამხდელთა სასარგებლოდ მიღებული გადაწყვეტილებები;
ქვეყანაში მოქმედი მცირე, საშუალო და მსხვილი ბიზნეს ორგანიზაციების 100-მდე წარმომადგენელთან გამართულ შეხვედრაზე:
ფინანსთა მინისტრმა ბიზნესმენებს გააცნო მთავრობის ეკონომიკურ პოლიტიკა, რომელის ერთ-ერთი მთავარი პრიორიტეტია - ბიზნესის წარმოება საქართველოში იყოს თავისუფალი ხელისუფლების წარმომადგენელთა ჩარევისგან, ქვეყანაში აღარ არსებობდნენ პრივილეგირებული ბიზნესმენები, კანონი ყველასთვის იყოს თანაბარი და ბაზარზე მოქმედებდეს ჯანსაღი კონკურენციის პირობები.
არაალკოჰოლური სასმელების მწარმოებელთა ასოციაციასთან მიღწეული შეთანხმებით:
ელექტრონულ მარკირებას დაქვემდებარებული პროდუქციის დადგენის ვადამ გადაიწია 1 მაისამდე;
გამოიცა ფინანსთა მინისტრის ბრძანება, რომლის თანახმადაც, საექსპორტო პროდუქცია არ დაექვემდებარება მარკირებას;
ფინანსთა მინისტრი ყველა საწარმოში მისვლას და პრობლემების ადგილზე გაცნობას გეგმავს; (პირველი შეხვედრა გაიმართება 16 მარტს 14 საათზე „ბორჯომის" ქარხანაში)

ნავთობპროდუქტების იმპორტიორთა ასოციაციაში შემავალი კომპანიების: „ვისოლის," „გალფის," „სოკარის," „ლუკოილის," „რომპეტროლის" წარმომადგენლებთან მიღწეული შეთანხმებით:
გაგრძელდება მუდმივი დიალოგზე ნავთობიმპორტიორებთან, რათა მოსახლეობამ მიიღოს ხარისხიანი პროდუქცია იაფად;
შეიქმნება სამუშაო ჯგუფები, რომლებიც აქტიურად იმუშავებენ ტექნიკური, მათ შორის, ბუნებრივ დანაკარგებთან დაკავშირებული საკითხების მოსაგვარებლად;
საქართველოში მოქმედი კომერციული ბანკების პირველ პირებთან მიღწეული შეთანხმებით:
ფინანსთა სამინისტროსგან ბანკები ყოველდღიურ რეჟიმში მიიღებენ ინფორმაციებს ბიუჯეტის შესახებ, ზოგადად, ეკონომიკაში მიმდინარე პროცესებზე.
საბანკო სექტორთან დიალოგი აქტიურად გაგრძელდება;

მიმდინარეობდა აქტიური შეხვედრები ინვესტორებთან, მათ შორის, შედგა მოლაპარაკებები ისეთ მსხვილ კომპანიებთან, როგორებიც არინ: ტრანსნაციონალური კომპანია „ტატა გრუპი,"„დაბი-ჯგუფი", გაიმართა შეხვედრა ქართულ-უკრაინული ბიზნეს-საბჭოს წევრებთან. ამ და სხვა შეხვედრებიდან გამომდინარე, საქართველოს ხელისუფლებას აქვს ოპტიმისტური მოლოდინები ქვეყანაში საკმაოდ სერიოზული ინვესტიციების მოზიდვის მიმართულებით.