აშშ-ის ახალმა სახელმწიფო მდივანმა ჯონ კერიმ უცხოელ ლიდერებთან პირველი სატელეფონო საუბრები გამართა. აშშ-ის სახელმწიფო დეპარტამენტის პრეს-სამსახურის ინფორმაციით, კერიმ ისრაელის პრეზიდენტთან შიმონ პერესთან, პრემიერ-მინისტრთან ბენიამინ ნეთანიაღუსთან და პალესტინის ავტონომიის ლიდერთნ მაჰმუდ აბასთან ისაუბრა. მოგვიანებით ის იაპონიისა და სამხრეთ კორეის საგარეო საქმეთა მინისტრებს დაუკავშირდა.
ნეთანიაღუმ ჯომ კერის გააცნო ახალი მთავრობის ფორმირების სამუშაოები. კერიმ კი თავის მხრივ კვლავ დაადასტურა აშშ-ის მხრიდან ისრაელის სახელმწიფოს უსაფრთხოების მხარდაჭერა და ისრაელსა და პალესტინას შორის მშვიდობიანი თანაცხოვრების მიღწევის სურვილი. მხარებმა ასევე განიხილეს ირანისა და სირიის საკითხები.
მაჰმუდ აბასთან საუბრისას კერიმ ასევე ყურადღება გაამახვილა პალესტინასა და ისრაელს შორის მშვიდობის მიღწევის აუცილებლობაზე. "მან (კერიმ. რედ) ასევე პირობა მისცა გაგრძელდეს მუშაობა კონგრესში პალესტინის ავტონომიისთვის აშშ-ის ბიუჯეტიდან თანხის გამოყოფის თაობაზე", - აცხადებს სახელმწიფო დეპარტამენტი.
აშშ-ის ადმინისტრაციის ინფორმაციით, ახლო აღმოსავლეთის დარეგულირება ჯომ კერის საქმიანობის ერთ ერთი პრიორიტეტი იქნება. არსებული ინფორმაციის მიხედვით კერის პირველი უცხოური ვიზიტი სწორედ ახლო აღმოსავლეთში განხორციელდება. ის სავარაუდოდ ისრაელსა და ეგვიპტეს ეწვევა.
სახელმწიფო დეპარტამენტის ინფორმაციით კერი ასევე ესაუბრა თავის კოლეგებს კანადაში, თურქეთში და მექსიკაში.
