ბათუმს საქართველოში საფრანგეთის სრულუფლებიანი ელჩი სტუმრობს. რენო სალენსმა პირველი ოფიციალური შეხვედრა ქალაქის მერთან გამართა. შეხვედრაზე რენო სალენსმა და ჯემალ ანანიძემ საფრანგეთის ქალაქ ნიცასა და ბათუმის დამეგობრებაზე ისაუბრეს.
ბათუმის მერის განცხადებით, ორ ზღვიპირა ქალაქს შორის მეგობრობა, კულტურისა და ხელოვნების სფეროებში ურთიერთთანამშრომლობას, გაცვლით ღონისძიებებსა და ტურისტულ სფეროში გამოცდილების გაზიარებას ითვალისწინებს.
რენო სალენსის განცხადებით, ბათუმში მისი ვიზიტის მთავარი მიზანი საფრანგეთსა და აჭარის რეგიონს შორის მეგობრული ურთიერთობების გაღრმავებაა. დღევანდელ შეხვედრაზე გადაწყდა, რომ ბათუმს უახლოეს ორ თვეში ნიცას ოფიციალური დელეგაცია ეწვევა.
