ამერიკის შეერთებული შტატების პრეზიდენტი ბარაკ ობამა, რომელმაც ნოემბრის არჩევნებზე გამარჯვება მოიპოვა, სახელმწიფოს მეთაურის პოსტზე თავის მეორე ოთხწლიან ვადას იწყებს. ის დღეს ქვეყნის კონსტიტუციაზე დაიფიცებს. ინაუგურაციის საზეიმო ცერემონია კი თეთრ სახლში, ვაშინგტონის ცენტრში აღლუმის და სხვადასხვა საზეიმო ღონისძიებების თანხლებით, ორშაბათს შედგება.
როგორც პრეზიდენტის პრეს-მდივანი ჯეი კარნი იუწყება, დღევანდელი ცერემონია თეთრი სახლის ცისფერ ოთახში გაიმართება. ცერემონიალს დაესწრებიან პრეზიდენტის ოჯახის წევრები, უახლოესი თანაშემწეები და ჟურნალისტების მცირე ჯგუფი.
ძირითადი კანონის მიხედვით, ობამამ უნდა წარმოთქვას შემდეგი სიტყვა: „მე საზეიმოდ ვფიცავ და ვადასტურებ, რომ პატიოსნად შევასრულებ ამერიკის შეერთებული შტატების პრეზიდენტის მოვალეობას და რამდენადაც იქნება ჩემ შესაძლებლობებში, დავიცავ და გავუფრთხილდები შეერთებული შტატების კონსტიტუციას". ხოლო სიტყვის დასასრულს პრეზიდენტი დაამატებს: „ღმერთი იყოს ჩვენი მფარველი".
ცნობილია, რომ უკანასკნელ დღეებში, პრეზიდენტი ობამა ინაუგურაციაზე წარმოსათქმელ სიტყვაზე ბევრს მუშაობდა. პრეზიდენტმა ეს სიტყვა კონგრესის წინაშე უნდა წარმოთქვას. ვარაუდობენ, რომ მასში საუბარი იქნება ადმინისტრაციის მომავალ ოთხწლიან ამოცანებზე, მორალურ პრინციპებზე და საკაცობრიო ღირებულებებზე, რომელიც სახელმწიფოს მართვისა და სოციალური განვითარებისათვის აუცილებელია.
