„საერთაშორისო გამჭვირვალობა - საქართველოს" საჯარო სამასახურების ხელმძღვანელ პირებს რეკომენდაციით მიმართავს და მოუწოდებს თანამშრომლების სამსახურიდან გათავისუფლება საქართველოს კანონმდებლობის შესაბამისად დაასაბუთონ.
ორგანიზაციაში მიიჩნევენ, რომ ქვეყნის ნორმალური განვითარებისთვის მდგრადი და სტაბილური საჯარო სამსახურის არსებობა ძალიან მნიშვნელოვანია და ხელისუფლების ცვლილებასთან ერთად სახელმწიფოს ბიუროკრატიული აპარატი ძირითადად იგივე უნდა იყოს და ცვლილებები უმეტესწილად პოლიტიკური და ხელმძღვანელი თანამდებობის პირებს შეიძლება შეეხოს. ამის შესახებ ხელისუფლების სხვადასხვა მაღალი თანამდებობის პირებიც საუბრობდნენ. საჯარო სამსახურის პოლიტიზებას საქართველოს კანონმდებლობაც კრძალავს და პოლიტიკური ნიშნით საჯარო მოხელის სამსახურიდან დათხოვნა ან ერთი ადამიანის მეორეთი ჩანაცვლება დაუშვებელია.
„საერთაშორისო გამჭვირვალობა - საქართველოს" განმარტავს, რომ საჯარო სამსახურიდან ადამიანის გათავისუფლება მხოლოდ იმ შემთხვევაში იქნება გამართლებული, თუკი პირს დაუმტკიცდება კანონის, შიდა განაწესის ან სხვა სახის სერიოზული დარღვევა ან თუ მას არ გააჩნია სათანადო კვალიფიკაცია, ადგილობრივი თვითმმართველობების ხელმძღვანელ თანამდებობის პირებმა საკადრო ცვლილებები უნდა განახორციელონ მხოლოდ კონკურსისა და ატესტაციის გზით და მიღებული გადაწყვეტილებები მაქსიმალურად დაასაბუთონ, ასევე მეტი ინფორმაცია მიაწოდონ საზოგადოებას ახლადაყვანილი პირების სამსახურებრივი გამოცდილების შესახებ; აუცილებელია სამართალდამცავმა ორგანოებმა, სათანადო რეაგირება მოახდინონ საჯარო სამსახურებიდან უკანონოდ დათხოვნის, მათ შორის, განცხადების დაწერის იძულების გახშირებულ ფაქტებზე; პოლიტიკური პარტიების ლიდერებმა კიდევ ერთხელ უნდა მოუწოდონ თავის აქტივისტებს და მომხრეებს, თავი შეიკავონ კანონსაწინააღმდეგო ქმედებებისა და საჯარო სამსახურების მუშაობის ხელის შეშლისგან; სასურველია პრემიერ მინისტრის აპარატთან შეიქმნას მონიტორინგის ჯგუფი, რომელიც გააკონტროლებს საჯარო სამსახურში მიმდინარე პროცესებს, მათ შორის, განსაკუთრებულ ყურადღებას მიაქცევს რეგიონებს.
შეგახსენებთ, რომ „საერთაშორისო გამჭვირვალობა - საქართველოს" ინფორმაციით, პირველი ოქტომბრის საპარლამენტო არჩევნების შემდეგ ადამიანების გათავისუფლება საჯარო სამსახურებიდან მასობრივად ხდება. ყველაზე მეტი 493 ადამიანი კი საქართველოს შინაგან საქმეთა სამინისტროდან დაითხოვეს.
