"საქართველოს სახელმწიფოს სხვადასხვა ანგარიშზე აკუმულირებულია ორ მილიარდ ლარზე მეტი", - განაცხადა ჟურნალისტებთან საქართველოს პრემიერ-მინისტრობის მოვალეობის შემსრულებელმა ივანე მერაბიშვილმა, რომელმაც ოპონენტების ბრალდებებს უპასუხა და აღნიშნა, რომ საქართველოს ბიუჯეტში ორ მილიარდ ლარზე მეტია.
"ორი ოქტომბრის მდგომარეობით, მას შემდეგ სერიოზული ცვლილება არ მომხდარა. საქართველოს სახელმწიფოს სხვადასხვა ანგარიშზე აკუმულირებულია ორ მილიარდ ლარზე მეტი. ხელისუფლებაში მოსვლამდე ტექნიკურ უნივერსიტეტში ვმუშაობდი და ვიცი ერთი რამ: შეიძლება ზოგიერთი პოლიტიკოსი იტყუებოდეს და ზოგიერთი არ იტყუებოდეს, მაგრამ ციფრები არასოდეს არ იტყუებიან", - განაცხადა მერაბიშვილმა, რომელმაც აღნიშნა, რომ საჭიროების შემთხვევაში ყველა ეს თანხა სახელმწიფო ბიუჯეტის ანგარიშზე განთავსდება.
"საკმარისია ახალი პრემიერ-მინისტრის ბრძანება და ყველა ეს თანხა ზუსტად ნახევარ საათში მოხვდება ბიუჯეტის ანგარიშზე, თუ ამის სურვილი ახალ მთავრობას ექნება", - განაცხადა მერაბიშვილმა.
შეგახსენებთ, რომ საქართველოს ფინანსთა მინისტრობის კანდიდატის, ნოდარ ხადურის განცხადებით, საქართველოს ბიუჯეტში არასაკმარისი თანხებია.