ესტონეთის საგარეო საქმეთა მინისტრის, მარგუს ცაჰკნას განცხადებით, აშშ-ს ესტონეთისთვის არ მიუმართავს თხოვნით, შეარბილოს რუსეთისგან მომდინარე საფრთხეებთან დაკავშირებული განცხადებების ტონი.
ამის შესახებ ცაჰკნამ ესტონურ მედიასთან ინტერვიუში ისაუბრა.
მინისტრის თქმით, აშშ ესტონეთის პოზიციას პატივს სცემს, რადგან ქვეყანა რუსეთის საკითხებში ექსპერტად მიიჩნევა. მისივე განმარტებით, ვაშინგტონს ესტონეთისთვის არც საგარეო პოლიტიკის და არც კომუნიკაციის შეცვლის შესახებ ოფიციალური რეკომენდაციით არ მიუმართავს.
„აშშ-ს არ გაუკეთებია ჩვენთვის არანაირი ოფიციალური შეთავაზება, რომ რაიმე ფორმით შევცვალოთ ჩვენი საგარეო პოლიტიკა ან კომუნიკაცია. საუბარია ანონიმურ წყაროებზე, რომელთა კომენტირებაც არ შემიძლია და არც მსურს. თუმცა, აშშ-სა და მთლიანად ნატო-ში ესტონეთის მოსაზრებას დიდ პატივს სცემენ, რადგან რუსეთის საკითხებში ნამდვილად ექსპერტები ვართ“, - განაცხადა ცაჰკნამ.
მისი თქმით, ესტონეთს რუსეთის შესახებ ღრმა ცოდნა აქვს, ხოლო ქვეყნის საექსპერტო შეფასებები და სადაზვერვო ინფორმაცია მაღალი შეფასებით სარგებლობს.
ცაჰკნას განცხადებით, ესტონეთი აშშ-სთან მუდმივ კონტაქტზეა უსაფრთხოების პოლიტიკის, ქვეყანაში ამერიკული ჯარების განთავსებისა და ნატო-ს თავდაცვის გეგმების საკითხებზე. ამასთან, მინისტრმა აღნიშნა, რომ ესტონეთის ინტერესებში რუსეთის პროვოცირება არ შედის და, მისი შეფასებით, დაძაბულობის ინიციატორი თავად რუსეთია.
„ჩვენზე არანაირი ზეწოლა არ ხორციელდება არც ერთი მიმართულებით - ამ საკითხებს ერთად განვიხილავთ“, - აღნიშნა მან.
ესტონეთის საგარეო საქმეთა მინისტრმა ასევე უარყო, რომ ბალტიის ქვეყნებს, მათ შორის ესტონეთს, რუსეთის შესახებ განცხადებებში აგრესიული ტონი გამოუყენებიათ. მისი შეფასებით, მსგავსი ნარატივი რუსეთის პრეზიდენტ ვლადიმირ პუტინის სურვილს უკავშირდება, შეარყიოს დასავლეთის პოლიტიკური ერთიანობა.
ცაჰკნას განცხადება მას შემდეგ გავრცელდა, რაც სააგენტო Reuters-მა დაწერა, რომ პენტაგონის წარმომადგენლებმა ბალტიის ქვეყნებს რუსეთისგან მომდინარე საფრთხეებთან დაკავშირებული რიტორიკის შერბილებისკენ მოუწოდეს.
ამ ცნობასთან დაკავშირებით ლიეტუვის თავდაცვის მინისტრმა რობერტას კაუნასმა განაცხადა, რომ ასეთი თხოვნის შესახებ ინფორმაცია არ აქვს. მისივე თქმით, ლიეტუვა რუსეთის შესახებ განცხადებებს ფაქტებზე დაყრდნობით აკეთებს.
