ახალი მთავრობა პირობას დებს, რომ ბიზნესს ხელისუფლების ღონისძიებების დაფინანსება აღარ მოუწევს. როგორც "ქართული ოცნების" სამთავრობო პროგრამაშია აღნიშნული, მთავრობა ინვესტორებს შეუქმნის სტაბილურ სამართლებრივ გარემოს; გაათავისუფლებს ხელისუფლების ზეგავლენისაგან და შეუქმნის საკუთრების დაცვის მყარ გარანტიებს; გაათავისუფლებს მეწარმეებს "ვალდებულებისაგან", დააფინანსონ ხელისუფლების ღონისძიებები და გაწიონ ხელისუფლების მიერ იძულებით თავსმოხვეული "ქველმოქმედება";
"ასევე გაააქტიურებს მუშაობას ევროკავშირსა და აშშ-sთან თავისუფალი ვაჭრობის შესახებ შეთანხმების დასადებად. ამ მიზნით, საერთაშორისო მოთხოვნების შესაბამისად, განახორციელებს ცვლილებებს შრომის კოდექსში, შემოიღებს კონკურენციის შესახებ რეალურ კანონმდებლობას და რეგულირების მექანიზმებს, უზრუნველყოფს სტანდარტიზაციისა და სერტიფიცირების მექანიზმების დანერგვას და სურსათის უსაფრთხოებას, რაც ამ შეთანხმებების დადების აუცილებელი წინაპირობაა; განახორციელებს საგარეო ვაჭრობის ინტერვენციებისგან დაცვის რეგულირების ანტიდემპინგურ ღონისძიებებს; უხარისხო საქონლისა და დემპინგური ფასებისგან დაიცავს ადგილობრივ ბაზარს მსოფლიოს სავაჭრო ორგანიზაციის წესდების შესაბამისად; უზრუნველყოფს სამუშაო ადგილების შექმნას, გააუმჯობესებს დასაქმების პირობებს და იზრუნებს იმისათვის, რომ საქართველოს მოქალაქეებს აღარ მოუხდეთ საზღვარგარეთ მძიმე პირობებში მუშაობა", - ნათქვამია სამთავრობო პროგრამაში.
