გონიოში მდებარე სასტუმრო "მარეთის" ყოფილი მფლობელი ქონების დაბრუნებას ითხოვს. ადგილობრივი მედია იტყობინება, რომ საოჯახო ტიპის სასტუმროს ყოფილი მეპატრონე ომარ მახარაძე აცხადებს, რომ კერძო საკუთრებაში არსებული ობიექტი ხელისუფლებამ 2009 წელს უკანონოდ, იძულების წესით ჩამოართვა.
როგორც ომარ მახარაძე ამბობს, მოგვიანებით შეიტყო, რომ 2007 წელს აღნიშნულ საქმეზე სასამართლო პროცესი მიმდინარეობდა. სასამართლო განჩინებაში კი წერია, რომ მას ქონება, როგორც ემზარ კვიციანთან დაახლოებულ პირს, ჩამოერთვა. აჭარის ტელევიზიის ინფორმაციით, სასტუმროს ყოფილი მფლობელი ბრალდებას უარყოფს და აცხადებს, რომ ემზარ კვიციანს საერთოდ არ იცნობს. ომარ მახარაძის ინფორმაციით, სასტუმრო "მარეთი" ამჟამად შინაგან საქმეთა სამინისტროს ბალანსზეა. ყოფილ მეპატრონეს სარჩელი ევროსასამართლოში აქვს შეტანილი. ომარ მახარაძე ახალ ხელისუფლებას დახმარების თხოვნით მიმართავს.