ფიფამ (ფეხბურთის მმართველი საერთაშორისო ორგანიზაცია), მიმდინარე კვირაში ბუდაპეშტში გამართულ კონგრესზე, კოსოვოს ამხანაგური საერთაშორისო მატჩების ჩატარების ნება დართო. ამ ფაქტს მოჰყვა აფხაზეთის არაღიარებული რესპუბლიკის შესაბამის ორგანოთა „ამოძრავება", რომლებიც ასეთივე გამონაკლისის დაშვებას ითხოვენ.
წარმოგიდგენთ საქართველოს ფეხბურთის ფედერაციის პრეზიდენტის დომენტი სიჭინავას ოფიციალური წერილის თარგმანს, რომელიც ფიფას პრეზიდენტის, იოზეფ ბლატერის სახელზეა გაგზავნილი და აფხაზეთის საკითხს შეეხება.
„საქართველოს ფეხბურთის ფედერაციისთვის ცნობილი გახდა, რომ აფხაზეთის არაღიარებული რესპუბლიკის ხელმძღვანელობამ ფიფას თხოვნით მიმართა, რათა ამხანაგური მატჩების გამართვის უფლება მიიღოს. ამის შესახებ რუსულ გამოცემებს განუცხადა არაღიარებული აფხაზეთის ფეხბურთის ფედერაციის პრეზიდენტმა ჯამალ გუბაზმა.
საქართველოს ტერიტორიული მთლიანობა და საზღვრები, რომლის ერთიანობაში შემოდის აფხაზეთი და სამხრეთ ოსეთი, აღიარებულია მსოფლიოს საერთაშორისო ორგანიზაციების მიერ, ამჟამად აღნიშნული ტერიტორიების ოკუპაციის გამო, საქართველო ვერ ახორციელებს თავის იურისდიქციას. გამომდინარე აქედან, საქართველოს ფეხბურთის ფედერაცია, როგორც ფიფას და უეფას აღიარებული ერთადერთი ფეხბურთის მაკონტროლებელი ორგანო საქართველოში, აფხაზეთის და სამხრეთ ოსეთის ტერიტორიაზე ვერ ახორციელებს ფეხბურთთან დაკავშირებული პროცესების მართვას.
ფიფას და უეფას წევრი საქართველოს ფეხბურთის ფედერაციისთვის, ცნობილია, ვაღიარებთ და პატივს ვცემთ ყველა სამართლებრივ ნორმებს, რომლის ჩარჩოებში მოქმედებს ფიფა. გამომდინარე აქედან, ჩვენ იმედი გვაქვს, არაღიარებული აფხაზეთის ფეხბურთის ფედერაციის ფიფაში გაწევრიანების მოთხოვნის ან ამხანაგური მატჩების გამართვის უფლების მიღების მოთხოვნის შემთხვევაში, დაიცავთ თქვენი წევრი საქართველოს ფეხბურთის ფედერაციის ინტერესებს და უარს ეტყვით არაღიარებული აფხაზეთის ფეხბურთის ფედერაციის არალეგიტიმურ მოთხოვნას.
საქართვველოს ფეხბურთის ფედერაცია მზად არის აფხაზეთის და სამხრეთ ოსეთის ტერიტორიაზე მოქმედი ნებისმიერი საფეხბურთო სუბიექტი სურვილის შემთხვევაში გახდეს საქართველოს ფეხბურთის ფედერაციის წევრი, რაც თავისთავად განაპირობებს მათ, ფიფას და უეფას ერთიან სამართლებრივ სივრცეში შემოსვლას".