ირაკლი ოქრუაშვილის ფრანგი ადვოკატი მოძრაობა "სამართლიანი საქართველოსთვის" კიდევ ერთYწარმომადგენელს დაიცავს. ქრთამის აღების ბრალდებით დაკავებული მარლენ ნადირაძის სარჩელი ევროსასამრთლოში იანვრის ბოლოს შევა.
ადვოკატი ტიერი ლევი მისი დაცვის ქვეშ მყოფთან შეხვედრის მიზნით რამდენიმე დღის წინ საქართველოშიც იმყოფებოდა, თუმცა ნადირაძესთან შეხვედრა ვერ შეძლო.
როგორც ფრანგმა ადვოკატმა ჟურნალისტებს განუცხადა, ევროსასამართლოში მარლენ ნადირაძე საქართველოს მართლმსაჯულების მიერ მის წინააღმდეგ გამოტანილ იმ გადაწყვეტილებას გააპროტესტებს, რომლის მიხედვითაც ირაკლი ოქრუაშვილის თანაგუნდელს თავისუფლების 7,5 წლით აღკვეთა მიესაჯა.
"მარლენ ნადირაძე ქართველმა სამართალდამცველებმა კორუფციის ბრალდებით დააკავეს, მაგრამ მის დაკავებას პოლიტიკური სუნი ასდის. არ მომეცა საშუალება, შევხვედროდი ჩემი დაცვის ქვეშ მყოფს, რითაც ადამიანის უფლებათა ევროპული კონვენცია დაირღვა, რასაც საქართველო უკვე რამდენიმე წელია უერთდება. ეს საქართველოს მთავრობისთვის სახარბიელო არ არის, რადგან გვაფიქრებინებს, რომ თქვენს ქვეყანაში ადამიანის უფლებები არცთუ კარგადაა დაცული. ყველაფრის მიუხედავად, იანვრის ბოლოს ევროსასამართლოში სარჩელი მაინც შევა და ვფიქრობ, საქმის მოგება არ გაგვიჭირდება", - განუცხადა ტიერი ლევიმ ჟურნალისტებს საქართველოდან გამგზავრების წინ.
მისი შეფასებით, სასჯელის ის ზომა, რაც ნადირაძეს ქრთამის აღებისთვის შეეფარდა, ბრალდების ადეკვატური არ არის.
ფრანგმა ადვოკატმა საქართველო გუშინ დატოვა.
შეგახსენებთ, რომ ირაკლი ოქრუაშვილს საფრანგეთში პოლიტიკური თავშესაფრის მინიჭებაში სწორედ ტიერი ლევი დაეხმარა.
რაც შეეხება მარლენ ნადირაძეს, ის ქრთამის აღების ბრალდებით 2007 წლის 6 ნოემბერს დააპატიმრეს.
