საქართველოს მთავრობამ 2024 წელს ქვეყანა ადამიანის უფლებათა სფეროში კრიზისამდე მიიყვანა, - ნათქვამია Human Rights Watch-ის ანგარიშში, რომელიც დღეს გამოქვეყნდა.
როგორც ორგანიზაცია წერს, მთავრობამ მიიღო ახალი რეპრესიული კანონები, გააჩაღა პოლიციელთა მიერ ძირითადად მშვიდობიანი მომიტინგეების მიმართ სასტიკი ძალადობა, ევროკავშირში გაწევრიანების გზას გადაუხვია და უარი თქვა რეფორმებზე ადამიანის უფლებათა სფეროში.
Human Rights Watch-ის ანგარიში მიმოიხილავს მსოფლიოს 100 ქვეყანაში არსებულ ადამიანის უფლებათა პრაქტიკას.
ორგანიზაციის აღმასრულებელი დირექტორი ტირანა ჰასანი შესავალში წერს, რომ მსოფლიოს უმეტეს ნაწილში მთავრობები არბევდნენ და უკანონოდ აპატიმრებდნენ პოლიტიკურ ოპონენტებს, აქტივისტება და ჟურნალისტებს.
"მთავრობას დაუნდობლად მიჰყავს ქვეყანა რეპრესიულ ეპოქაში, რომელი საქართველოსთვის უცნობია, მაგრამ ძალიან ნაცნობია ავტორიტარულ სახელმწიფოებში. მაგრამ არასდროს არ არის გვიან, რომ შეცვალოს კურსი, გააუქმოს რეპრესიული კანონები, დაუშვას შეკრების თავისუფლება, შეწყვიტოს ძალადობა მომიტინგეების წინააღმდეგ და პასუხისმგებლობა დააკისროს პოლიციას," - განაცხადა ჰიუ უილიამსონმა, Human Rights Watch-ის ევროპისა და ცენტრალური აზიის დირექტორმა.
"მთავრობამ შეაჩერა საქართველოს ევროკავშირში გაწევრიანების პროცესი 26 ოქტომბრის საკამათო საპარლამენტო არჩევნებიდან ერთი თვის შემდეგ. ამ არჩევნების შედეგად, რომელიც ადგილობრივი დამკვირვებლებისა და პრეზიდენტის მტკიცებით გაყალბდა, ძალაუფლების სადავეებთან კვლავ მმართველი პარტია დარჩა. [ევროკავშირში გაწევრიანების შეჩერების] გადაწყვეტილება მიღებულ იქნა საქართველოს კონსტიტუციის მიუხედავად, რომელიც ამტკიცებს ევროკავშირში სრულ ინტეგრაციას, როგორც სახელმწიფოს მიზანს და მოსახლეობის დაახლოებით 80%-ის ევროკავშირში გაწევრიანების სურვილს, რამაც გამოიწვია მრავალკვირიანი საპროტესტო აქციები მთელი ქვეყნის მასშტაბით.
სამართალდამცავებმა პროევროპულ პროტესტს ძალადობრივი გზით, ცრემლსადენი გაზის, წყლის ჭავლის, რეზინის ტყვიებითა და სხვადასხვა ფიზიკური ძალადობის გამოყენებით უპასუხეს. სპეცრაზმმა და ხელისუფლებასთან დაკავშირებულმა არაფორმალურმა ძალადობრივმა ჯგუფებმა სცემეს ოპოზიციის წარმომადგენლებსა და დამოუკიდებელ ჟურნალისტებს და დაუსჯელად ერეოდნენ მათ მუშაობაში...", - ნათქვამია ანგარიშში.
Human Rights Watch-ი თავის ანგარიშში ყურადღებას ამახვილებს "უცხოური აგენტისა" და ანტი-ლგბტ კანონების შესახებ. ორგანიზაციის განცხადებიტ, ანტი-ლგბტ კანონი აწესებს დისკრიმინაციულ შეზღუდვებს განათლების, ჯანმრთელობის, გამოხატვის თავისუფლებისა და მშვიდობიანი შეკრების უფლებებზე.
ორგანიზაციის განცხადებით, საქართველოს საერთაშორისო პარტნიორებმა დამოუკიდებელი გამოძიება უნდა მოითხოვონ მშვიდობიანი აქციების ძალადობრივი მეთოდებით დაშლის შესახებ და უნდა განიხილონ ინდივიდუალური სანქციების დაწესება იმ ოფიციალური პირების მიმართ, რომლებიც პასუხისმგებლები არიან დემონსტრანტებზე ძალადობაზე.
