ცვლილებები საჭიროა, განსაკუთრებით დაცვის ხაზში. მე არ მგონია, რომ ვინმე სხვა, ჩემს მაგივრად, უფრო სწრაფად მოახერხებს ამის შეცვლას, - ამის შესახებ საქართველოს საფეხბურთო ნაკრების მთავარმა მწვრთნელმა ვილი სანიოლმა ესპანეთთან მატჩის შემდეგ პრესკონფერენციაზე განაცხადა.
"თამაშის შედეგი ბევრ რამეზე მეტყველებს. დაცვაზე ბევრი მუშაობა მოგვიწევს. ახალი დაცვის ხაზს ვაშენებთ და ძალიან ბევრი მუშაობაა საჭირო. ოქტომბრისგან განსხვავებით, ახლა დადებითი, პოზიტიური მომენტი გამოჩნდა. კარგები ვიყავით ბურთთან ერთად და შედარებით უკეთ გამოვიყურებოდით შეტევების ორგანიზების დროს. ყველაზე მთავარი ჩემთვის ის არის, რომ ბიჭებმა ბოლომდე იბრძოლეს — სამომავლოდ, ეს ძალიან მნიშვნელოვანია. თუმცა, როცა ასეთი გუნდის წინააღმდეგ თამაშობ, დაცვაში შეცდომები მინიმუმამდე უნდა დაიყვანო.”- თქვა სანიოლმა.
მისი თქმით, ლიერი დაცვის ხაზის შექმნას დიდი დრო სჭირდება.
"რამდენიმე მოთამაშემ თავისი რესურსი ამოწურა — ცვლილებები საჭიროა, განსაკუთრებით დაცვის ხაზში. მე არ მგონია, რომ ვინმე სხვა, ჩემს მაგივრად, უფრო სწრაფად მოახერხებს ამის შეცვლას. 5 წელი გავიდა, უკვე კარგად მიცნობთ, ტყუილად საუბარი არ მიყვარს. მე მუდმივად ვლაპარაკობ იმ პრობლემებზე, რაც გვაქვს. ძლიერი დაცვის ხაზის შექმნას დიდი დრო სჭირდება — ეს სწრაფად ვერ მოხერხდება. მარტში უკეთესი გუნდი ვიქნებით, აი სექტემბერში კი ბევრად უკეთეს ნაკრებს იხილავთ,” - განაცხადა სანიოლმა.
მისი თქმით, ესპანეთის ნაკრების მთავარ მწვრთნელს, დე ლა ფუენტეს უთხრა, რომ ესპანეთის ნაკრებთან აღარასდროს ითამაშებს.
“ჩვენ ძალიან კარგი ურთიერთობა გვაქვს. მე მას ვუთხარი, რომ იმედია, ეს მის წინააღმდეგ ჩატარებული ჩემი ბოლო შეხვედრაა. თუ მის წინააღმდეგ კიდევ მომიწევს თამაში, პოსტს დავტოვებ. ის, თუ როგორ ფეხბურთს თამაშობს მისი ფორმაციის ესპანეთის ნაკრები, უბრალოდ წარმოუდგენელია. ასეთი ფეხბურთის თამაში ძალიან რთულია. იმედია, ერთ დღეს საქართველოს ნაკრებიც ითამაშებს მსგავს ფეხბურთს. ძალიან ბევრი კომპლიმენტი მაქვს მისი ფეხბურთის მიმართ,” - თქვა სანიოლმა.
საქართველოს საფეხბურთო ნაკრები მსოფლიო ჩემპიონატის შესარჩევ ეტაპზე მეხუთე მატჩში ესპანეთთან 0:4 დამარცხდა. ხუთი ტურის შემდეგ საქართველოს ნაკრები ჯგუფში მე-3 ადგილზეა. ჩამორჩება ესპანეთსა და თურქეთს და ჯგუფიდან გასვლის თეორიული შანსიც აღარ აქვს. ქართველები შესარჩეი ეტაპის ბოლო მატჩს 18 ნოემბერს ბულგარეთში გამართავენ. შეხვედრა 23:25 საათზე დაიწყება
