თბილისის საქალაქო სასამართლოს ინიციატივითა და განათლებისა და მეცნიერების სამინისტროს მხარდაჭერით გამართული სამართლებრივი ოლიმპიადის გამარჯვებული საქართველოს უნივერსიტეტის გუნდი გახდა.
როგორც "ჯი-ეიჩ-ენს" თბილისის საქალაქო სასამართლოდან აცნობეს, გამარჯვებული გუნდი განათლებისა და მეცნიერების მინისტრის მოადგილემ კოკა სეფერთელაძემ დააჯილდოვა და მიუკერძოებლობისა და სამართლიანობის სიმბოლო თემიდა გადასცა. თბილისის საქალაქო სასამართლოს მენეჯერის ვანო ზარდიაშვილის განცხადებით, გამარჯვებული გუნდის წევრები სტაჟირებას თბილისის საქალაქო სასამართლოში გაივლიან. სტუდენტური ოლიმპიადა საზოგადოებრივი სასამართლოს პროექტის ფარგლებში ჩატარდა და მასში თბილისის ივანე ჯავახიშვილის სახელობის სახელმწიფო უნივერსიტეტის, საქართველოს ტექნიკური უნივერსიტეტის, საქართველოს უნივერსიტეტის, კავკასიის უნივერსიტეტისა და სოხუმის სახელმწიფო უნივერსიტეტის სტუდენტები მონაწილეობდნენ.
სამართლებრივი ოლიმპიადა, რომელიც საერთო სპეციალიზაციის მიხედვით (სამოქალაქო, ადმინისტრაციული და სისხლის სამართლი) გაიმართა, 5 ეტაპს მოიცავდა: კაზუსის ამოხსნა; სამართლებრივი კითხვები; იურიდიულ ტერმინთა მნიშვნელობა; გუნდის კაპიტანთა შეჯიბრი და სამართლებრივი შეცდომების კორექტირება.
ოლიმპიადის თემატური საკითხები თბილისის საქალაქო სასამართლოს ადმინისტრაციამ განსაზღვრა, სამართლის შემდეგი დარგებიდან: ადამიანის უფლებათა საერთაშორისო სამართალი, სისხლის სამართალი, სისხლის სამართლის პროცესი, სამოქალაქო სამართალი, სამოქალაქო სამართლის პროცესი, ადმინისტრაციული სამართალი და ადმინისტრაციული სამართლის პროცესი. საკითხების რაოდენობა თანაბრად გადანაწილდა სამოქალაქო, სისხლის და ადმინისტრაცული სამართლიდან. სხვადასხვა უმაღლესი სასწავლებლების ექვსწევრიანმა გუნდებმა, ერთმანეთს თეორიული ცოდნა და პრაქტიკული უნარ-ჩვევები გაუზიარეს. გამარჯვებული გუნდი კომპეტენტურმა ჟიურიმ გამოავლინა.
სამართლებრივი ოლიმპიადის მიზანია, სასამართლოსა და მომავალი იურისტების დაახლოება,მათი სამართლებრივი ცოდნის გაღრმავება, პრაქტიკული უნარ-ჩვევების განვითარება, მათი უშუალოდ ჩართვა მართლმსაჯულების განხორციელების პროცესში და, რაც მთავარია, დანაშაულის პრევენციაზე ზრუნვა.
