რესპუბლიკელმა სენატორმა ჩრდილოეთ კაროლინიდან, ტომ ტილისმა განაცხადა, რომ აშშ-ის თავდაცვის დეპარტამენტის გენერალურ ინსპექტორს მიმართავს და უკრაინაში Starshield-ის სისტემის მუშაობის შეზღუდვის საკითხის გამოძიებასა და კონგრესისთვის ანგარიშის წარდგენას მოითხოვს.
სენატორის თქმით, შეზღუდვების გამო საფრთხე შეექმნათ როგორც უკრაინის სამოქალაქო პირებს, ისე ამერიკელ დიპლომატებსა და უსაფრთხოების სამსახურების თანამშრომლებს. მისი განცხადებით, შეზღუდვები ყოველგვარი წინასწარი გაფრთხილების გარეშე დაწესდა.
„ბოლო ცნობები მიუთითებს, რომ ეს სტრატეგიული შეცდომა შესაძლოა თავდაცვის დეპარტამენტის (DOD) Starshield-ის სისტემებში, უფრო კონკრეტულად, ლოკალურ დონეზე მომხდარიყო და არა Starlink-ის ან SpaceX-ის სისტემებში.
არ მაქვს მოლოდინი, რომ თავდაცვის მდივანი ჰეგსეთი ამ საკითხზე გამჭვირვალობას უზრუნველყოფს, ამიტომ თავდაცვის დეპარტამენტის გენერალურ ინსპექტორს მივმართავთ და მოვითხოვთ, დაიწყოს გამოძიება და ანგარიში წარუდგინოს კონგრესსა და ამერიკელ ხალხს.
უკრაინის სამოქალაქო პირები, ასევე აშშ-ის დიპლომატიური და უსაფრთხოების სამსახურების თანამშრომლები გაუმართლებელი საფრთხის წინაშე აღმოჩნდნენ - ყოველგვარი წინასწარი გაფრთხილების გარეშე.
საუკეთესო შემთხვევაში, ეს იყო მიუღებელი შეცდომა ან დაუდევრობა, უარეს შემთხვევაში კი - რუსეთის თავდასხმისთვის გზის გასაკაფად მიღებული შეგნებული გადაწყვეტილება", - წერს სენატორი სოციალურ ქსელში.
მანამდე სენატორმა ილონ მასკს სთხოვა, დაედასტურებინა, რომ უკრაინაში Starlink-ის მუშაობის შეფერხებები უნებლიე იყო. მან ასევე გააფრთხილა მასკი, რომ უკრაინის თავდაცვის უნარის განზრახ შეზღუდვა შეიძლება შეფასდეს, როგორც „მასობრივი მკვლელის ხელშეწყობა“.
მოგვიანებით ტილისმა აღნიშნა, რომ ბოლო მონაცემებით, პრობლემა შესაძლოა სწორედ Starshield-ის სისტემას უკავშირდებოდეს, რომელიც აშშ-ის თავდაცვის დეპარტამენტს ეკუთვნის, და არა Starlink-ს ან SpaceX-ს.
როგორც ცნობილია, მასკმა განაცხადა, რომ Starshield-ის მუშაობაზე შეზღუდვების დაწესების გადაწყვეტილებებს აშშ-ის სამხედროები და პრეზიდენტი იღებენ, ხოლო კომერციული სისტემა Starlink შეტევითი სამხედრო მოქმედებებისთვის არ უნდა გამოიყენებოდეს.
უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთი ცდილობს უკრაინაში Starlink-ის მუშაობასთან დაკავშირებული პრობლემები მასშტაბური შეტევებისთვის გამოიყენოს. მისი თქმით, ჩამჭრელი დრონების მუშაობა დიდწილად სწორედ ამ სატელიტურ კავშირზეა დამოკიდებული.
უკრაინული მხარის ცნობით, SpaceX-მა 14 ოქტომბრის ღამეს, თავდაცვის ძალების წინასწარი გაფრთხილების გარეშე, ცალმხრივად შეზღუდა Starshield-ის სამხედრო პაკეტის მუშაობა. ამან უპილოტო საფრენი აპარატების მისიების შესრულება, მათ შორის, ჩამჭრელი დრონების გამოყენება გაართულა.
