უკრაინის პრეზიდენტმა ვოლოდიმირ ზელენსკიმ განაცხადა, რომ თანამდებობიდან გადადგომას არ აპირებს, რადგან ომს საკუთარ პასუხისმგებლობად მიიჩნევს.
ზელენსკის თქმით, უკრაინის პრეზიდენტის არჩევის უფლება არც აშშ-ის პრეზიდენტ დონალდ ტრამპს აქვს, არც მილიარდერ ილონ მასკს და არც ვინმე სხვას მსოფლიოში.
„არც ტრამპს, არც მასკს და არც სხვას მსოფლიოში არ შეუძლია უკრაინის პრეზიდენტის არჩევა. ამის გაკეთება მხოლოდ უკრაინის მოქალაქეებს შეუძლიათ“, - განაცხადა ზელენსკიმ.
ბრიტანელ ჟურნალისტ პირს მორგანთან ინტერვიუში უკრაინის პრეზიდენტმა ვოლოდიმირ ზელენსკიმ გამორიცხა არჩევნების ჩატარება საბრძოლო მოქმედებების დასრულებამდე.
კითხვაზე, აპირებს თუ არა ნებაყოფლობით გადადგომას, ზელენსკიმ უპასუხა: „რა თქმა უნდა, არა. ეს ჩემი პასუხისმგებლობაა“.
ზელენსკის თქმით, „ზოგიერთ გავლენიან ადამიანს მისი შეცვლა სურს, რადგან ის არასდროს აღიარებს უკრაინის მიწას რუსეთის ტერიტორიად“.
„თუ ხელისუფლებას ჩამომაშორებენ, დარწმუნებული ვარ, ახალი ლიდერი - კაცი თუ ქალი ჩვენს ქვეყანას დაიცავს. რადგან ეს ჩვენი სახლია“, - აღნიშნა ზელენსკიმ.
მან ასევე უპასუხა კითხვას, შეძლებს თუ არა უკრაინა გამარჯვებას ამერიკელების მხარდაჭერის გარეშე.
„ჩვენ არავითარ შემთხვევაში არ დავკარგავთ დამოუკიდებლობას“, - თქვა ზელენსკიმ.
მან ასევე განაცხადა, რომ უკრაინისთვის აშშ-ის უსაფრთხოების გარანტიები უნდა ითვალისწინებდეს რუსეთის წინააღმდეგ ამერიკის პასუხს იმ შემთხვევაში, თუ რუსეთი უკრაინას ხელახლა დაესხმება თავს.
„თუ პუტინი უკრაინას თავს დაესხმება, ტრამპი პუტინს დაარტყამს. თუ ეს დოკუმენტში ჩაიწერება, სწორედ ეს იქნება უსაფრთხოების გარანტია“, - განმარტა უკრაინის პრეზიდენტმა.
